Presidenti Donald Trump dhe republikanë të tjerë e kanë cilësuar projektligjin e miratuar mëngjesin e sotëm si “të madh dhe të bukur”.
Sipas mediave të huaja, duke u përqendruar në shkurtimet e taksave dhe të shpenzimeve, legjislacioni do të përfshijë shkurtimet e taksave të sjella gjatë mandatit të parë të Trump, si dhe do të sjellë masa shtesë.
Prioritete të tjera për Presidentin janë eliminimi i taksave mbi bakshishet, shpenzimi më i madh për mbrojtjen dhe sigurinë kufitare dhe shkurtimi i programeve qeveritare të kujdesit shëndetësor, përfshirë Medicaid, një program shëndetësor që synon amerikanët me të ardhura të ulëta.
Projektligji u prit me kritika nga disa republikanë, si dhe nga demokratët.
Disa prej tyre ishin të shqetësuar se shkurtimet do të ishin të dëmshme për individët me të ardhura më të ulëta, të tjerë donin që projektligji të shkonte më tej.
Në një postim në rrjetet sociale, presidenti amerikan e quan atë “ndoshta pjesa më e rëndësishme e legjislacionit që do të nënshkruhet ndonjëherë në historinë e vendit tonë!”
Ai sugjeron se kjo do të sjellë një sërë përfitimesh, duke përfshirë “ULJE MASIVE TË TAKSAVE” dhe “Rritje të pagave për agjentët tanë të ICE-së dhe të patrullës kufitare”.
Trump më pas vlerëson republikanët që votuan për projektligjin dhe thotë se “nuk ka kohë për të humbur” përpara se Senati të fillojë punën mbi të.
