Një mjek është vënë në pranga në qytetin e Rrëshenit pasi mori ryshfet për një akt ekspertimi.
Z.P, 63-vjeç punonte mjek ligjor në spitalin e Rrëshenit. Denoncimi u bë nga Gj.S 55 vjeç, banues në fshatin Spiten në Lezhë, të cilit mjeku i kishte kërkuar dhe marrë 100 euro për të kryer një akt-ekspertimi mjeko-ligjor.
Policia ka sekuestruar edhe shumën prej 100 euro që mori mjeku si ryshfet.
Ky rast është ndjekur në bashkëpunim me gazetarët e emisionit “Piranja”.
Njoftimi i Policisë:
Rrëshen, Mirditë
Mori një shumë parash, për të kryer një akt ekspertimi, vihet në pranga 63-vjeçari, me detyrë mjek ligjor në spitalin e Rrëshenit.
Sekuestrohet shuma 100 euro që mori i arrestuari.
Si rezultat i administrimit të menjëhershëm të kallëzimit të shtetasit Gj. S., 55 vjeç, banues në fshatin Spiten, Lezhë, se një mjek ligjor i spitalit të Rrëshenit, i kishte kërkuar dhe i kishte marrë 100 euro për të kryer një akt ekspertimi mjeko-ligjor për një çeshtje të 55-vjeçarit, specialistët e Seksionit për Hetimin e Krimeve Ekonomiko-Financiare të Drejtorisë Vendore të Policisë Lezhë arrestuan në flagrancë shtetasin Z. P., 63 vjeç, banues në Rrëshen, me detyrë mjek ligjor në spitalin e Rrëshenit.
Gjithashtu, në vijim të veprimeve procedurale për këtë rast u sekuestrua si provë materiale, shuma 100 euro që 63-vjeçari i mori shtetasit Gj. S., në kundërshtim me ligjin.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprën penale “Korrupsioni pasiv i personave që ushtrojnë funksione publike”.
Ky rast është ndjekur në bashkëpunim me gazetarët e emisionit investigativ “Piranjat”, ndaj Drejtoria Vendore e Policisë Lezhë i falënderon ata. Gjithashtu, fton gazetarët dhe qytetarët që të denoncojnë çdo paligjshmëri, duke iu garantuar reagim të menjëhershëm dhe të paanshëm, konform ligjit.
Discussion about this post