Në ditën e 28-të të protestës, kreu i Partisë Demokratike Lulzim Basha thotë se protesta ka hyrë tashmë në histori. Basha kërkoi ndjesë në emër të opozitës për të gjitha premtimet e pa mbajtura kryesisht ato që kanë pasur të bëjnë me shtresat në nevojë..
Kryetari i opozitës deklaroi se pushteti nuk është trashëgimi dhe Edi Rama nuk ka të drejtë hyjnore për të qenë kryeministër, por ka ardhur aty me një kontratë që nëse nuk përmbushet, qeveria largohet një orë e më parë.
“Nëse Republika e re dhe qeveria e re nuk përmbush premtimet me të cilat kërkon votën tuaj, është e drejta juaj legjitime që të mblidheni këtu dhe jo vetëm këtu por të futeni brenda dhe ta rrëzoni” tha Basha.
Basha u ndal edhe tek reforma në drejtësi duke theksuar se ajo do të realizohet nga gjyqtarë dhe prokurorë të pavarur.
Sot Basha zhvilloi një bashkëbisedim me personat me aftësi të kufizuar.
Më herët ishte i ftuar në çadër edhe shkrimtari shqiptar Kim Mehmeti, i cili deklaroi nga çadra se Rama ka mendime enveriste dhe se ai është i interesuar për një Shqipëri të fortë dhe me shtet të drejtë.
Sipas Mehmetit Rama e ka shumë edhe këtë mandat.
Kreu i Partisë Demokratike ka deklaruar vazhdimisht se opozita do rikthehet në Kuvend, vetëm nëse arrihet një qeveri teknike që ka besimin e gjithë forcave politike.
Basha ka thënë më përpara se në çadrën e opozitës ka socialistë që shkojnë çdo ditë me teserat e partisë të zhgënjyer nga qeverisja e Edi Ramës.
“Njerëz që i bashkohen kësaj levizje popullore që është më e madhe se Partia Demokratike, më e madhe se opozita siç është vetë kauza e zgjedhjeve të lira dhe të ndershme dhe më e madhe se çdo parti politike, të jesh i sigurtë, që një pjesë e këtyre socialisteve, për këtë levizje, kanë kryer misionin e saj të parë zgjedhje të lira dhe të ndershme. Me siguri, do të kthehet edhe Partia Socialiste apo do kthehet tek një parti tjetër. Sigurisht janë të mirëpritur të vijnë dhe të votojnë për PD-në. Por e vërteta është se këtu është një levizje popullore, kombëtare për një synim që është shumë më i madh se partitë politike”.
(M.D/ Shuplaka)
