Ditën e hënë presidenti i zgjedhur Ilir Meta do të betohet dhe do të marrë zyrtarisht titullin. Kështu ai do të lëvizë pak metra nga godina e Kuvendit drejt asaj të Presidencës, pjesë e të njëjtit bulevard qendror të kryeqytetit.
Sakaq, mësohet se në oborrin e Presidencës kanë nisur edhe përgatitjet për ceremonialin në zbatim të protokollit shtetëror.
“në orën 18:00, të së hënës, Presidenti i Republikës, Ilir Meta, mbërrin në hyrjen kryesore të Kuvendit dhe në këtë moment del aty për ta pritur Kryetari i Kuvendit, pra serish Ilir Meta, dhe, mbasi përshëndeten, hyjnë nëpërmjet sallës dhe zënë vend në podium. Kryetari i Kuvendit Ilir Meta, fton Presidentin e ri Ilir Meta të ngrihet në këmbë për të bërë betimin, ndërkohë të gjithë të pranishmit janë të ulur nëpër vendet e tyre. Kryetari i Kuvendit Ilir Meta fton Presidentin Ilir Meta për të marrë fjalën përshëndetëse para Kuvendit”, është itinerari sipas Protokollit.
Po ashtu, Balkanëeb shkruan se seancën do ta drejtojë nënkryetarja e Kuvendit Valentina Leskaj. Ndërsa kryetarja e LSI-së Monika Kryemadhi, ashtu sic ka deklaruar edhe më parë në media, nuk do të jetë në krah të bashkëshortit ditën e betimit. Kjo për të mbajtur fjalën se nuk do të pranojë postin e Zonjës së Parë. Kryemadhi do të jetë e ulur atje ku do të jenë të gjithë krerët e partive politike.
Detaji i radhës ka të bëjë me vendimin e presidentit të ardhshëm, që ka refuzuar vilën presidenciale, për të qëndruar në banesën e tij përgjatë 5 viteve që do të ushtrojë detyrën.
Nga ana tjetër, mësohet se Meta do të dorëzojë mandatin e deputetit, në mënyrë që të marrë postin e presidentit. KQZ pritet të plotësojë vakancën me listën pasuese të qarkut të Tiranës dhe kështu, Manjani i cili ndodhet i katërti në listë do të marrë postin e deputetit, të paktën për muajt që kanë ngelur. (D.D/Shuplaka)
