Në maj të vitit 2016, kur ish-ministri Saimir Tahiri ishte në krye të ministrisë së Brendshme, të gjithë i mbajnë mend shfaqjet me policë.
Në të gjitha mediat bënin xhiro pamjet e policave duke u kacavjerrë nëpër mure, duke pozuar para kamerave e duke thënë se me Tahirin në krye policia mund të ndalonte dhe deputetë e ministra.
I tillë ishte dhe rasti i policit Xhemil Haluli.
Pas 45-vitesh karrierë në Policinë Rrugore, Tahiri dhe Çako i dhuruan Xhemilit motorin me të cilin kishte shërbyer.
Video: Propaganda e Tahirit me Xhemilin
Motori që siç pohonte asokohe Xhemili, ishte nën përdorimin e tij që kur Aleksandër Meksi ishte kryeministër.
Pas dy vitesh, fabula e ofruar nga Tahiri dhe Çako, u “shkërmoq”.
Një dokument i siguruar nga Fax News, nxorri në dritë, se për motorin që ju bë dhuratë Xhemilit, ministria dhe policia nuk kishin ndjekur asnjë procedurë ligjore.
Për këtë arsye, shefi i Policisë Rrugore të Tiranës, Erion Ahmeti, ka firmosur një shkresë më 16 mars të këtij viti, ku kërkon kthimin e motorit.
Në letër thuhet brenda 5 ditëve nga kjo datë, Xhemil Haluli duhet të paraqitet në komisariatin e policisë rrugore, për të bërë dorëzimin e motomjetit.
Sipas kësaj shkrese, nëse motomjeti nuk do të dorëzohej brenda 5 ditësh, atëherë vlera që ish-polic Xhemili duhet të paguante është 1 milionë e 739 mijë lekë të vjetra.
Në këto kushte, dhurata e Xhemilit, tashmë është kthyer sërish në duart e policisë.
Ka qenë auditi i komisariatit të policisë rrugore në Tiranë, që ka konstatuar shkeljen e bërë nga ish ministri Saimir Tahiri dhe ish numri 1 i policisë, Haki Çako me dhurimin e motorit pa asnjë dokumentacion përkatës.
Rubrika e suprizave qeveritare
Nuk ishte Tahiri i pari që organizonte të tilla parodi si kjo e Xhemilit, që sot është kthyer në ato që njihen si barcaletë me policë.
Në mes të një gare me kryebashkiakun Erion Veliaj, Tahiri përpiqej me çdo kusht të ishte në çdo ekran, duke inaguruar uniformat e reja, duke kërkuar rritje rrogash 6 muaj para zgjedhjeve për policët.
Në garën për vëmendje mediatike, Tahiri u sinkronizua me dritat e kamerave të Veliajt, duke u kthyer në dy “siamezë”.
Nëse Rama i dhuroi Ilir Kananit (mësues në prag daljes në pension), një buqetë me lule, Tahiri i dha motorin Xhemilit, ndërsa Veliaj do prezantonte Alban Skënderajn në Top Awards.
Një makineri propagande e gjitha në funksion të tërheqjes së vëmendjes nga problemet reale të vendit.
Mjaftoi një rast si ky i Xhemilit për të treguar se si ka funksionuar fasada në 4 vitet që lamë pas.
Dinjiteti i një punonjësi të administratës u vu poshtë për të dalë në televizion në prime time.
45 vitet e karrierës në Policinë e Shtetit iu shpërblyen me një motor “lodër”, për t’i treguar pas dy viteve:
“Kaq ishte loja, Xhemil!”
E s’na mbetet veçse të themi: “I kemi parë të gjitha, s’duam të shohim më akoma!”
(Fjola Graçi /Faxweb.al)
