Kryetari i LIBRA-s, Ben Blushi, ka reaguar së fundmi ndaj padisë për shpifje të ngritur një ditë më parë nga ish-ministrja e Arsimit, Lindita Nikolla, aktualisht kandidate e PS-së për deputete në Lezhë.
Pas akuzave dhe replikave të forta mes tyre në seancën plenare të 23 marsit, ku Ben Blushi e akuzoi Lindita Nikollën se kishte marrë 3.000 euro për një vend pune, ai sot ka reaguar për padinë e ngritur ndaj tij.
Duke e cilësuar “Lindita Parsimi”, referuar punës së saj në krye të ministrisë së Arsimit dhe Sportit, ai shkruan se Nikolla e ka zakon të mos i ndahet dikujt, sikurse badigardit të saj nuk iu nda as në burg.
“ERDHI DITA PËR LINDITA
Lindita Parsimi paska thënë, se nuk do më ndahet as në gjyq. E ka zakon. Bodigardit të vet që merrte 3 mijë euro për një vend pune nuk ju nda as në burg.”, shkruan Ben Blushi.
Një ditë më parë, rreth kësaj ore, ish-ministrja Nikolla bëri me dije se kishte nisur procedurën e padisë për shpifje ndaj Blushit, duke e cilësuar si “shpifarak profesionist”, “njeriun më parazit që ka njohur në jetën e saj”, “i cili sulmon paturpësisht me gojën e tij të shthurrur nga ligësia e mediokritetit”.
“Dua t’ju bëj me dije se sot kam nisur procedurën e padisë për shpifje për Ben Blushin. Nuk do t’i ndahem këtij shpifaraku profesionist, derisa ai të marrë dënimin e merituar në gjykatë.
Një karrierist i llastuar nga jeta, që tri herë u bë ministër dhe tri herë u largua nga detyra pa bërë asnjë punë, nuk mund të shitet sot si politikë e re, pas 20 vitesh në korridoret e pushtetit. Një personazh i pangopur, që i kërkonte ministrave “mediokër” të Edi Ramës, favore.”, shprehej ajo ndër të tjera.
(XH.A/SHUPLAKA)
