Pas kundërshtive, që me gjasë nuk do ishin dëgjuar kaq fort korridoreve të Partisë Socialiste, në Partinë Demokratike ka rënë një qetësi e përkohshme.
Astrit Patozi, kundërshtari i fortë i Lulzim Bashës, vendosi të mos përballej me të, të shtunën e 22 korrikut. Erion Piciri dhe Astrit Sinanaj nuk u kualifikuan për të garuar përballë Bashës, ndërsa tani ka mbetur që kundërshtari i vetëm i kryetarit me funksione të ngrira, të jetë Eduard Selami.
”Prozhektorët” janë drejtuar nga PD-ja. Çfarë do ndodhë aty?! Si do garojnë Basha me Selamin? Çfarë do vazhdojnë të bëjnë kundërshtarët Patozi, Topalli, Bregu, Imami, Ruli?! Përpos zërave se mund të bashkohen për një parti të re, një fakt duhet se është i pashmangshëm: heshtja e Sali Berishës përballë tyre.
Kështu, me një të rënë të lapsit, vetëm me mbledhjen e Kryesisë, u rrëzua edhe kërkesa për analizën e humbjes së zgjedhjeve, duke vendosur që zgjedhjet në PD automatikisht të mos shtyhen e debatet të mbyllen.
Tani mes ditëve të nxehta të korrikut, duket se Lulzim Bashës do t’i duhet t’i rikthehet edhe njëherë fushatës mes të vetëve, demokratëve. Pas ditësh heshtjeje, që sa mbylli deklaratën e vështirë të humbjes për cilindo kryetar partie, Basha nuk u duk gjëkundi. Ditën e djeshme, disa orë para mbledhjes së Kryesisë që vetë mungoi, ai u fotografua e filmua në ambjentet e të vetmit lokal pranë selisë duke shtrënguar duart me demokratët.
Çfarë do bëjë tani Basha?! Siç mëson ”Shuplaka”, ai do të kapet pas të vetmes fitore të rëndësishme që demokratët arritën në zgjedhje: Bashkisë së Kavajës.
Është pikërisht vendimi i Bashës për të nisur nesër në orën 19:00 fushatën si kandidat nga qyteti i Kavajës, përkrah demokratëve e kryebashkiakut Isa Sakja, që do të rikthejë edhe njëherë në fushën e betejës edhe stafin e tij.
Me një program që është gati, përballë ideve të Selamit, pritet që këto ditë korriku të ketë sërish zhvillime nga politika, në mos më shumë në kampin kundërshtar: pas perdeve të godinës përballë së cilës Basha qëndroi për 3 muaj por nuk ia doli dot ta fitonte. /Valmora Gogo-SHUPLAKA
