Presidenti i vendit, Bujar Nishani ka shprehur ngushëllimet e tij për ndarjen nga jeta të gazetarit, analistit dhe publicisitit, Andrea Stefanit. Duke shprehur ngushëllime për familjarët e tij Nishani thotë se humbja e Andrea Stefanit është e trishtueshme për këdo, por ajo që e lehtëson sado pak dhimbjen është trashëgiminia shpirtërore dhe intelektuale që ai la pas.
Letra e plotë e Nishanit:
“Të dashur familjarë të të ndjerit Andrea, lajmin për ndarjen nga jeta të bashkëshortit dhe babait tuaj të shtrenjtë e të pazëvendësueshëm, e mësova me hidhërim të madh! Në cilësinë e Kreut të Shtetit, por edhe si një njeri që e ka njohur Andrea Stefanin, dëshiroj t’ju shpreh ngushëllimet e sinqerta, duke u përpjekur t’ju gjendem shpirtërisht pranë në këto çaste përjetimi të kësaj dhimbje të thellë! Me ikjen e parakohshme nga kjo botë, Andrea do t’ju mungojë në mënyrë të pazëvendësueshme jo vetëm ju, familjes dhe njerëzve të dashur, por edhe kolegëve të tij gazetarë dhe analistë, sidomos shoqërisë civile shqiptare, ku ai dallohej gjithmonë për shpirtin luftarak dhe pasionin e pashtershëm, me të cilët luftonte e përpiqej për kauzat dhe bindjet e veta, pa bërë kompromis për asgjë që nuk i dukej e drejtë. Humbja e Andreas është e trishtueshme për këdo, por ajo që e lehtëson sadopak dhimbjen është trashëgimia shpirtërore dhe intelektuale, që i shpalosi gjatë gjithë jetës dhe veprimtarisë së tij profesionale, duke nderuar familjen, si dhe duke pasuruar gazetarinë dhe aktivizmin civil shqiptar. Shpirti i Andreas u prehtë në paqe!”
Discussion about this post