Një aksident, mbrëmjen e djeshme, rreth orës 20:33, që ka plagosur një person duke e lënë në gjendje të rëndë, është shkaktuar në rrugën kombëtare, pranë fshatit Krahës.
Gazetari dhe këshilltari i Drejtorisë së Burgjeve, Elio Laze jep detaje, duke thënë se ”po thuhet se shkaktar është vetë drejtori i Policisë së Qarkut Gjirokastër”, duke ngritur pyetjen pse kjo ngjarje është mbajtur e fshehtë. I plagosuri, sipas Lazes është Axhem Mërtiri.
”Ngjarje e fshehur apo hetim në vijim?
Në orën 20:33 minuta në rrugën nacionale pranë fshatit Krahës një automjet BMW Serie 1 (për arsye etike s’po publikoj targën), ka shkaktuar një aksident automobilistik me një të plagosur rëndë.
Këtu fillon historia. Në rradhë të parë automjeti që ka shkaktuar aksidentin nuk ka ndaluar në vendngjarje. Dhe më e rënda e historisë është që automjeti thuhet se i përket drejtorit të Policisë së Qarkut Gjirokastër. I plagosuri Axhem Mërtiri ndodhet në gjendje të rëndë në spitalin rajonal të Fierit.
Përse kjo ngjarje nuk është bërë publike ende?”, shkruan Laze.
”Shuplaka” pas kontaktit me burime të policisë mëson se versioni i Policisë së Gjirokastrës për aksidentin është ky:
”Në aksin rrugorë Levan -Tepelenë, në hyrje të fshatit Lulëzim, një mjet i paidentifikuar, ka aksidentuar shtetasin A.M, 59 vjeç, banues në fshatin Lulëzim, Memaliaj dhe është larguar nga vendi i ngjarjes. Shtetasi i dëmtuar ndodhet në Spitalin Civil Fier dhe ndodhet jashtë rrezikut për jetën.”.
Policia konfirmon largimin nga vendi i ngjarjes, por nuk jep asnjë detaj për autorin e dyshuar, duke thënë veçse që mjeti është i paidentifikuar. Gazetarët janë duke punuar për të marrë rrëfimin e familjarëve të të aksidentuarit dhe detaje rreth ngjarjes së rëndë. Momentalisht mësohet se Mërtiri ndodhet ende në gjendje të rënë në Reanimacion.
(V.G/SHUPLAKA)
Discussion about this post