Nga Flutura Açka
Gomorra: në gjueti të politikanëve mafiozë lindorë për plehrat
30 milion ton mbeturina, afërsisht sa masa e Everestit po pret për rrugë për në Europën Lindore ose Afrikë… në varësi ku mafia italiane do të gjejë dorëzanët e vet.
Mjafton lajmi i fundit (i rremë apo i vërtetë, qoftë) i zhdukjes nëpër Shqipëri të rreth 30 mijë ton plehra, që verën e ardhshme turistët e huaj (edhe ata shqiptarë) t’i grisin biletat për Shqipëri. Në fakt ne flasim për një revolucion demokratik, por na duhet një revolucion kimik për ta pastruar politikën tonë nga mafiozë me pushtet që mund t’ia bëjnë gjëmën një perle europiane si Shqipëria. Mjafton beteja kundër Ligjit të Importit të Plehrave (Mbetjeve) për të kuptuar se sa e brishtë dhe e rrezikshme është situata.
Në jug të Italisë, pranë Napolit është vendi ilegal i hedhjes së mbetjeve, prej nga mafia italiane fiton miliarda çdo ditë. Është fjala për 300 km2 vend në formën e një trekënëshi mbi qytetin e Napolit e me një sipërfaqe të përafërt me ishullin e Maltës. Në atë vend tani përqindja e fëmiëve të vdekur është më e frikshmja në Itali. Mbi 30 milion ton mbeturina, mes tyre fshehur edhe zing, asbest, plumb e të tjera, të fshehura mes mbetjeve të zakonshme, tani kanë krijuar një masë më e madhe se vetë Everesti. Askush nuk merret t’i përpunojë ato, vetëm i hedhin e i hedhin çdo ditë; askush nuk i ndal dot dhe zërat e qytetarëve të thjeshtë humbin e shuhen nën centrifugën e miliadave eurove që ble çdo politikan që kalon dhe shqetësohet atypari. Disa vite më parë, sipas investigimeve nga 18 grumbullues mbetjesh në Napoli, 15 prej tyre kishin lidhje të drejtpërdrejtë me Gomorran, tani duhet të jenë padyshim të 18 të lidhura, a mos më shumë, sepse Mafia hap e mbyll kompani me emra të çuditshëm që të humbë gjurmët. Mbetjet i hedhin e i fshehin mes pemëve dhe më pas paguajnë njerëz me ngjyrë që t’i djegin, tymi dhe gjithçka përhapet rrotull, duke e kthyer të gjithë vendin në të pajetueshëm, por masa sa vjen e shtohet përditë dhe mafia i duhet t’i çojë diku tjetër.
Dikur kjo zonë, për shkak të hirit të Vezuvit ka qenë ndër më pjellorët në botë, tani mafia e ka kthyer në vend të pajetueshëm, njerëzit po e braktisin përditë. Tani ëhstë kthyer në Mafialand, Gomorraland. Për shkak të uljes së çmimeve të produkteve nga kjo zonë, fermerët po e lënë dhe po largohen, duka ia shitur fare lirë tokën mafias, që vazhdon ende të gllabërojë pafund toka të reja për male të reja plehërash, pra për miliarda të reja për vete dhe politikanët e korruptuar, që kanë zbuluar më së fundi biznesin superfitimprurës të hedhjes së plehrave (veçmas atyre kimike), a thua se nuk është po e njëjta tokë ku do të jetojnë edhe ata. Tani sytë e Mafias italiane janë drejtuar nga vendet e Lindjes dhe Afrika, dhe ku ka më afër se njëqind milje përtej Adriatikut, pasi bisnesi ka më pak shpenzime dhe fitimet janë të sigurta, veçmas kur dihet se në ç’duar mafioze politikanësh ka rënë Europa Lindore qysh nga rënia e kampit komunist.
Ndaj besoj se ka qenë një nga fitoret mëdha të shqiptarëve, pra të vetë shqiptarëve, dhe jo të politikës së saj, që të paktën ligjërisht nuk lejohet helmatisja e Shqipërisë me plehrat e kontrolluara nga Mafia italiane.
Ky është fillimi i historisë, fundin nuk e dimë; dimë vetëm që duhet ta shpëtojmë Shqipërinë nga këta thonj që do të na e zhbëjnë atë përjetë, dhe në sytë tanë. E të na e kthejnë në Mafialand, ose Gomorraland.
Discussion about this post