Në sajë të operacionit “Patrioti” është gjendur një tjetër tenxhere me para nga policia. Sipas policisë ato janë gjendur në zonën e Bathores në kryeqytet, në banesën e Admir Çerpjas. Këto janë paratë e vjedhura të bankës, të cilat po transportoheshin drejt Rinasit.
Arrestimi i tij u bë i mundur mbrëmjen e djeshme, afër mesnatës. Kontrollet e policisë vijojnë në mbarë vendin në kuadër të operacionit “Patriot”. Admir Çerpja është një nga 6 grabitësit e 3.2 milionë euro në zonën e Qafë Kasharit. Edhe në Vlorë disa ditë më parë gjatë kontrolleve të policisë janë gjetur para të futura brenda tenxhereve me presion.
“Vijon operacioni “Patriot”. Gjendet një tjetër sasi e konsiderueshme parash të dyshuara të grabitura. Në afërsi të banesës së Admir Çerpja në Bathore, policia gjen një tenxhere presioni të mbushur me Euro e Paund. Tenxherja ishte e groposur. Vijojnë kërkimet pasi dyshohet për sasi të tjera”, thuhet në njoftimin e policisë.
Gjatë operacionit për arrestimin e autorëve të grabitjes, policia gjeti një pjesë tjetër të parave, të groposura në disa tenxhere presioni në Vlorë, pranë banesës së Neim Avdulajt, dhe një shumë tjetër në servisin e Fatjon Xhyliut, të dy të arrestuar për ngjarjen.
Deri më tani në pranga për grabitjen spektakolare të 3.2 milionë dollarëve të bankës, janë vënë 5 persona. Në kërkim është edhe personi që konsiderohet si “koka” e bandës, Admir Murataj, për të cilin policia është duke zhvilluar aksione të gjera për ta kapur. (J.V/Shuplaka)
Discussion about this post