Nuk është i preferuari i Erdogan, një ditë para garës tërhiqet Skënder Bruçaj

Një ditë para votimit, është tërhequr nga gara kreu aktual i Komitetit Mysliman të Shqipërisë Skënder Bruçaj.

Burime për Fax Web bëjnë me dije se Bruçaj është tërhequr nga gara për arsye familjare. Kujtojmë se Bruçaj ka përfunduar mandatin 5-vjeçar, ndërkohë që ditën e nesërme pritet të bëhen votimet për kreun e ri.

Pas tërheqjes së kryetarit aktual, në garë mbetet Myftiu i Tiranës, Ylli Gurra dhe inspektori i xhamive i KMSH, Gëzim Abdishaku (Lexo këtu).

Ndërkohë për krreun e ri do të votojnë 35 myftinj, 12 anëtarët e kryesisë së KMSH dhe 45 anëtarë të shoqërisë civile.

Kujtojmë se gjatë vitit të kaluar, Bruçaj është akuzuuar nga një gazetë afër Presidentit turk, Erdogan si gulenist.

Gazeta Yeni Akit shkruan se Bruçaj është gulenist i bindur, aq sa edhe opinioni titullohet: Çfarë thotë ky FETO-shi?,- përcaktim që priret ta kthejë në neologjizëm fjalën fetosh.

Yeni Akit, ka marrë në shqyrtim disa deklarata të Bruçajt në disa dalje televizive, ku ai nuk e ka fshehur respektin për Fetullah Gulen duke mos kursyer kritikën e imët ndaj qeverisë kosovare për aktin e dorëzimit të gjashtë shtetasve turq në Kosovë të dyshuar si gulenistë.

(F.GJ/FAXWEB.AL)