Një i ri është vënë në prangat e policisë pas përndjekjes dhe kërcënimeve të vazhdueshme adresuar ish-të dashurës së tij dhe familjarëve të saj. Pas tetë muaj lidhje dashurie me shtetasin Tomas Beka, e reja ka vendosur t’i japë fund ndikuar edhe nga këmbëngulja e së ëmës. Por ky vendim nuk është mirëpritur nga i dashuri i saj, i cili fillimisht e ka shantazhuar me publikimin e videove intime të tyre. I irrituar edhe më tepër, ai ka vazhduar të kërcënojë e të përndjekë nënë e bijë.
“Do t’iu pres fytin, do të dergjeni në birucë, do t’iu vras…”, janë disa prej kërcënimeve të tij që e kanë detyruar vajzën të mbyllet në shtëpi nga frika. Megjithatë, nëna e saj, shtetësja me iniciale E. M. e ka denoncuar rastin në polici, për shkak të shqetësimeve të vazhdueshme që u shkaktonte ish- i dashuri i vajzës.
“Unë hyja në dyqan, ai vinte në dyqan dhe më shikonte me shikim provokues, unë ecja me vajzën në lagje, ai më ndiqte nga pas, më dilte përpara. Këto veprime të tij më krijonin një gjendje frike dhe ankthi të paparë, pasi prej këtij personi pret gjithçka. “, është shprehur ndër të tjera nëna e vajzës.
Fyerjet, kërcënimet dhe përndjekjet mësohet se kanë nisur në muajin Shkurt 2016. Por e dëmtuara ka provuar gjendje ankthi edhe më parë, në Dhjetor 2015, kur i akuzuari Beka ka plagosur një shok shkolle të vajzës. Shtetasi Tomas Beka është deklaruar fajtor nga Gjykata e Tiranësm duke u dënuar me 7 muaj e 20 ditë burgim për akuzën e “Përndjekjes”.
