Me ndryshimet në Kodin Penal, në Shqipëri do tëe aplikohet e drejta për të zëvendësuar dënimin me burg me një shumë parash të llogaritura.
Ministria e Drejtësisë parashikon uljen e numrit të të dënuarve në burgje duke ndjekur këtë procedurë. Kush paguan 5.000 lekë për një ditë burgim do të mundë të fitojë lirinë.
Ndryshimet në ligj parashikojnë përjashtimin nga përfitimi i të dënuarve me rrezikshmëri të lartë shoqërore, të dënuarve për vepra të rënda penale dhe baronëve të drogës. Është parashikuar përfitimi për një kategori të caktuar.
Përfshihen këtu të dënuarit deri në tre vjet burgim, ose të dënuarit që i kanë mbetur të shlyejnë 3 vjet dënim. “Shqiptarja.com” shkruan se duke paguar 5.000 lekë për çdo ditë burgim të mbetur, ata mund të gëzojnë lirinë.
“Të gjithë ato persona që janë dënuar me burgim deri në 3 vjet apo që u kanë mbetur pa vuajtur edhe 3 vjet burgim, mund të kërkojnë ta zëvendësojnë dënimin e mbetur me pagimin e një shume të hollash në favor të shtetit, duke llogaritur 5000 lekë për një ditë burgim. Në këtë rast, dënimi konsiderohet i shlyer”, thuhet në nenin 5 të projektligjit.
Pra një të dënuari që i kanë mbetur edhe 3 vjet burg për të lënë qelinë, duhet të paguajë 5.4 milionë lekë.
Sa i takon përllogaritjes së paraburgimit, koha e paraburgimit llogaritet në dënimin me burgim, gjobë ose punë në interes publik, ku për shembull një ditë paraburgim është barabartë me 1.5 ditë burgim.
Llogaritja e paraburgimit
Një ditë paraburgim e barabartë me 1.5 ditë burgim.
Një ditë arrest shtëpie e barabartë me një ditë burgim.
Një ditë paraburgim e barabartë me 3000 lekë gjobë
Një ditë burgim e barabartë me 2000 lekë gjobë.
Një ditë paraburgim e barabartë me 18 orë pune në interes publik.
(XH.A/SHUPLAKA)
Discussion about this post