Sekretari i përgjithshëm për Reformën Zgjedhore dhe njëherësh i propozuari si bashkëkryetar në Komisionin parlamentar për Reformën, Damian Gjiknuri është shprehur sot se në zgjedhjet e qershorit do operohet me Kodin aktual, për shkak se nuk premton koha.
“Në zgjedhjet e 30 qershorit do të hyjmë me këtë kod zgjedhor. Reforma zgjedhore do të jetë e vlefshme vetëm për zgjedhjet e ardhshme parlamentare. Koha nuk premton që të ndryshohen rregullat e lojës tani. Reforma Zgjedhore është e vlefshme për zgjedhjet e ardhshme parlamentare”, tha Gjiknuri.
Gjiknuri tha se e pret PD-në për Reformën Zgjedhore deri më datë 5 maj, ndërsa i është lënë edhe një vëzhgues me të drejtë propozimi dhe vetoje.
“Presim PD për Reformën Zgjedhore deri më datë 5 maj. Nëse PD propozon diçka pa cënuar Lokalet, Kodin e fusim në 30 qershor. I ofrojmë PD-së një vëzhgues me të drejtat si bashkë- kryetari. Përfaqësuesi i PD-së do jetë me të drejtë propozimi dhe vetoje”, vlerësoi Gjiknuri.
PS ka bërë kërkesë që Gjiknuri të jetë bashkëkryetar i Komisionit Zgjedhor, post që më herët mbahej nga Blerina Gjylameti.
