Qendra Kombëtare e Biznesit ka bllokuar aksesin elektronik në të gjitha dokumentet noteriale të kompanive të regjistruara në Shqipëri.
Faqja elektronike e QKB-së prej dy javësh i është nënshtruar një rikonstruksioni, duke ndryshuar në mënyrë bazike sistemin e tërheqjes së të dhënave.
Më parë dokumentacioni ofrohej nëpërmjet sistemit Microsoft-Word-Aspx. Në dokumentet e shkarkuara word, gjendeshin hyperlink-e të cilat përmbanin akte noteriale. Tashmë qendra ofron vetëm një paketë përmbledhëse PDF, ku në mënyrë telegrafike jepen gjurmë të veprimeve të kompanive, pa detajuar llojin e veprimit apo aktit të kryer. Dokumentet noteriale janë hequr, shkruan “Hashtag”.
Ndryshimi i sistemit të të dhënave privon sidomos median pasi QKB-ja ka luajtur një rol të rëndësishëm në shumë investigime të kryera në Shqipëri.
Ish-ministri i Ekonomisë Arben Ahmetaj, kur mori detyrën në vitin 2013, vlerësoi mundësinë e dhënies me koncension të vetë shërbimit të QKB-së, por ky plan u pezullua. Nuk dihet nëse bllokimi i të dhënave mund të jetë një hap i parë për të kaluar me koncension gjithë shërbimin në fjalë. (A.R/SHUPLAKA)
