Prokuroria italiane ka mbyllur hetimet, duke çuar të pandehur një shqiptar rreth të 50-tave, të akuzuar për përdhunim e dy femrave.
Ngjarjet për të cilat akuzohet banakieri shqiptar, dyshohet se kanë ndodhur në Mars dhe Prill 2017. Gjyqi ndaj shqiptarit, identiteti i të cilit nuk bëhet i ditur, pritet të nisë këtë muaj, sipas raportimeve të medieve italiane.
Sipas dëshmive të vajzave të përdhunuar, ku bazohet edhe akuza e prokurores Barbara Badellino, “modus operandi” i shqiptarit ishte i njëjtë në të dyja rastet: Ai hidhte drogë në pijet e bashkëpunëtoreve të tij, të dyja në provë, në orarin e mbylljes së barit në lagjen “Pozzo Strada” në Torino. Kjo, në mënyrë që ato të ndiheshin të pafuqishme. Më pas, abuzonte seksualisht me vajzat.
Në rastin e dytë, vajza e rënë pre e përdhunimit është minorene dhe skena është filmuar nga kamerat e sigurisë së biznesit.
Ajo ka bërë kallëzim duke çuar edhe në nisjen e hetimeve. Pikërisht në këqyrjen e kamerave të sigurisë së rastit të dhunës seksuale ndaj minorenes, hetuesit zbuluan edhe rastin e parë të përdhunimit.
Ndërkohë, i akuzuari, ka mohuar akuzat dhe pretendon se ishin vajzat që kanë tentuar më parë të bënin seks me të.
Discussion about this post