Përplasja me policinë në Elbasan, Suel Çela shpallet i pafajshëm

Gjykata për Krime të Rënda shpall të pafajshëm Suel Çelën dhe dënoi me 6 vite burg Enea Bekteshin dhe 5 vite burg Klement Xhaferrin.

Sipas gjykatës, Prokuroria nuk ka arritur të vërtetojë me prova të qarta përfshirjen e Suel Çelës në ngjarjen në Tregun Agroushqimor në Elbasan. Prova e gjetur në automjetin Audi, cigarja, nuk tregon nëse ka qenë ose jo në momentin e ngjarjes Suel Çela.

Të gjitha provat ndërkohë tregojnë se Enea Bekteshi ka qenë në makinën Audi i vetëm dhe ka gjuajtur në drejtim të efektivëve, por pa ndihmën e askujt, gjë që përjashton akuzën e grupit të strukturuar kriminal.

Bekteshi akuzohet për kundërshtim të forcave të policisë, goditje për shkak të detyrës dhe prodhim narkotikësh, ndërkohë që Xhaferri akuzohet për armëmbajtje pa leje dhe largim nga vendi i qëndrimit.

Incidenti, nga i cili u publikuan dhe video shkaktoi një reagim të madh në radhët e strukturave të policisë së Shtetit duke u bërë lajmi kryesor në mediet shqiptare.

Ngjarja e rëndë ndodhi mesnatën e 18 shtatorit kur një automjet i blinduar tip “Audi” A8, goditi makinën e patrullës së policisë, brenda të cilit ishte ish-zv.drejtori i Policisë, Gjergji Oshafi, që po shoqëronte për verifikim në komisariat një “Range Rover” me vlerë 100 mijë euro.