Operacioni Forca e Ligjit ka zbarkuar mesditën e sotme në Shkodër, ku ka kërkuar deklarimin pasuror të dy prej familjeve më të fuqishme të qytetit Juglindor, Bajri dhe Doçi.
Familja Bajri në Shkodër, një pjesë e anëtarëve të së cilës ndodhen në burg prej më shumë se një viti, dyshohen për aktivitet kriminal, për vepra kundër jetës së njeriut, përfshirë edhe vrasjen, pengmarrjen dhe gjobvënien ndaj bizneseve.
Ndërkohë familja Doçi është lakuar së fundi, pasi Gentiani një prej djemve të shtëpisë, dyshohet si porositës i pengmarrjes së Jak Prengës në Kamëz, për shkak të prishjes së pazareve për drogërat e forta.
Një ditë më parë OFL vendosi nën sekuestro pronat e familjes Hajri në Shijak, ndërsa sot kërkoi deklarimin pasuror të Ardian Çapjas në Elbasan dhe Lulzim Berishës në Durrës. (Lexo edhe ketu)
OFL tha se këta dy persona kanë 48 orë kohë të bëjnë deklarimin ne tyre pasuror, në të kundërt ajo mund të vendoset nën sekuestro me urdhër të drejtorit të Përgjithshëm të Policisë së Shtetit.
Të gjithë këta persona si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
(E.K/Faxweb.al)
Discussion about this post