Pak ditë pas zhvillimit të zgjedhjeve parlamentare në Maqedoni, situate paraqitet gjithnjë e më e tensionuar. Komisioni Shtetëror i Zgjedhjeve pranoi që të merrte në konsideratë disa prej ankesave të partive opozitare për parregullsi gjatë procesit zgjedhor.
Mediat shqiptare në Maqedoni bëjnë me dije se pas pranimit të ankesave nga ana e KSHZ-së, partia e Nikolla Gruevskit ka reaguar ashpër. Mësohet se VMRO-DPMNE u ka bërë thirrje mbështetësve të tij që të reagojnë duke rrethuar ndërtesën e Komisionit Shtetëror të Zgjedhjeve.
Referuar raportimeve të mediave maqedonase, një numër i madh mbështetësish u mblodhën për të protestuar përpara këtij institucioni gjatë mbrëmjes së djeshme. Ndër të tjera, ata thërrisnin “Hajdutë, hajdutë”, “Maqedonia, Maqedonia”, “VMRO VMRO”.
