Milani po kalon momentin më të vështirë të sezonit dhe trajneri Gennaro Gattuso, edhe pse i konfirmuar deri në fund, për mungesë alternativash, ka qenë në qendër të stuhisë. Pas ndeshjes, Leonardo, Gazidis dhe Maldini, treshja operative e klubit, kanë “masakruar” Rino Gattuson, trajnerin kuqezi, teksa ai që ka bërtitur më fort ishte drejtori sportiv, Leonardo.
Sipas asaj që shkruan “Sky”, në një orë e gjysmë të mbyllur në dhomat e zhveshjes, drejtuesit dhe trajnerit kanë ballafaquar idetë e tyre. Ai që ka folur më shumë ishte braziliani Leonardo, i cili nuk është përmbajtur, por ka shprehur gjithë pakënaqësinë.
Moduli i lojës, ndryshimet e shpeshta, forma e dobët e futbollistëvë dhe sidomos aspekti fizik. Këto kanë qenë temat kryesore, ndërsa edhe zëvendësimet e bëra nuk kanë pëlqyer aspak. Fakti që njëherë në mbrojtje luan Caldara (ndaj Lazios) dhe tri ditë më pas Musacchio duket i pakuptueshëm, ashtu si ulja në stol e Piatek apo zëvendësimi i Paquetas pjesën e dytë.
Pas mbledhjes me tone të larta, palët kanë lënë dhomat e zhveshjes. Gattuso ka dalë i pari duke iu drejtuar autobusit me ekipin, ndërsa më pas kanë dalë Leonardo, Gazidis dhe Maldini. Sot, treshja e drejtuesve është mbledhur në “Casa Milan”, ndërsa nuk është trajneri.
Ekipi është lënë pushim teksa stërvitjet do të rikthehen të martën. Sipas “Repubblica”, ndërkohë, merkato që parashikohet gjatë verës do të jetë Under 23, pra vetëm futbollistë të rinj dhe premtues. Asnjë i vjetër, asnjë me rrogë të lartë dhe asnjë për të cilin ka ankand.
Presidenti Scaroni, ndërkohë, në intervistën e dhënë sot, ka thënë se “Champions nuk ka ikur ende, do të provojmë deri në fund. Sigurisht, do të ketë devijim plani nëse nuk e arrijmë, por e kishim llogaritur edhe këtë mundësi”.
