Presidenti i Republikës, Sh.T.Z. Bajram Begaj, mori pjesë këtë të shtunë në Meshën e Shenjtë të organizuar për Papa Françeskun, e cila u mbajt përpara Bazilikës së Shën Pjetrit në Vatikan. Krahas shumë udhëheqësve botërorë, Presidenti Begaj ishte i pranishëm në këtë ceremoni të veçantë, i shoqëruar nga një delegacion shtetëror që kryeson, i përbërë nga Ministri për Evropën dhe Punët e Jashtme, z. Igli Hasani, Ministrja e Shtetit për Administratën Publike dhe Kundër Korrupsionit, znj. Adea Pirdeni, si dhe Ambasadorja e Shqipërisë pranë Selisë së Shenjtë, znj. Majlinda Frangaj.
Në nderim të Atit të Shenjtë, qeveria shqiptare ka shpallur ditë zie kombëtare, ndërsa flamuri kombëtar është vendosur në gjysmështizë në Institucionin e Presidentit të Republikës në Tiranë.
Papa Françesku gëzon një lidhje të veçantë me Shqipërinë, që nga vizita e tij historike në shtator 2014, shpallja Shenjtore e Nënë Terezës në vitin 2016, si dhe lumnimi i 38 martirëve shqiptarë të komunizmit po atë vit. Më 16 nëntor 2024, janë shtuar edhe dy martirë të tjerë në këtë listë.
Presidenti Begaj është pritur dy herë në Audiencë të veçantë nga Papa Françesku, në dhjetor 2022 dhe në maj 2024, duke dëshmuar marrëdhëniet e ngushta dhe respektin e ndërsjellë mes Shqipërisë dhe Selisë së Shenjtë.
