Presidenti i Republikës së Shqipërisë, Bajram Begaj, ka shprehur ngushëllime për ndarjen nga jeta të At Antonio Bellusci, priftit arbëresh të Frasnitas në Arbërinë e Kalabrisë, misionar, intelektual dhe atdhetar i devotshëm.
Kreu i Shtetit u shpreh se At Antonio Bellusci ka kontribuar në njohjen e identitetit arbëresh duke nxitur zhvillimin kulturor të komuniteteve ku ishte famullitar.
Postimi i plotë:
Eparkia e Lungros, komunitetet arbëreshe dhe i gjithë kombi shqiptar janë në zi për humbjen e ikonës albanologe, gazetar, shkrimtar, pedagog dhe etnolog, At Antonio Bellusci, një mbështetës i jashtëzakonshëm në mbrojtje të trashëgimisë kombëtare.
At Antonio Bellusci kontribuoi në njohjen e identitetit arbëresh duke nxitur zhvillimin kulturor të komuniteteve ku ishte famullitar. Ai tregoi një angazhim të jashtëzakonshëm në shërbim të komunitetit.
Nëpërmjet revistës “Lidhja”, si dhe kërkimeve të ndryshme gjuhësore dhe etnografike, ai arriti të përcjellë trashëgiminë kulturore arbëreshe duke e lidhur më fort komunitetin arbëresh në Kalabri me atë të shpërndarë në botë.
At Antonio Bellusci do të kujtohet përjetë nga secili prej nesh si një përbashkues i arbëreshëve dhe puna e tij nuk do të shlyhet kurrë nga kujtesa jonë.
Discussion about this post