Presidenti Ilir Meta i ka dhënë goditjen përfundimtare opsionit të hedhur në tregun politik prej kohësh që të bëhet ‘negociator’ i palëve në krizë.
“Nuk mund të ulem unë në tavolinë me një që thotë ky nuk më pëlqen si kryeministër dhe tjetri që thotë që zgjedhjet e 30 qershorit do të jenë sukses për demokracinë“, është shprehur Meta në Konferencën e Sigurisë në Ballkan.
Presidenti në fjalën e tij nuk e ka moderuar aspak gjuhën e tij në lidhje me çështjet më të rëbndësishme që shqetësojnë sot rajonin por më së shumti u ndal në krizën e brendshme politike sidomos problemet me reformën në drejtësi etj të cilën e quajti jo efektive, pasi prej muajsh vendi është pa gjykatë Kushtetuese dhe Gjykatë të Lartë. Madje ai nuk la pa shigjetuar maxhorancën ndërsa aludoi se me anë të kësaj reforme po tentohet të kapen institucionet.
Meta nuk ka kursyer në fjalën e tij asnjërin nga liderët politik, Edi Ramën dhe Lulzim Bashën të cilët prej muajsh janë vënë përballë njëri-tjetrit në ‘llogore’ me retorikë të ashpër politike.
Basha është i vendosur që opozita nuk do të hyjë në zgjedhje me Edi Ramën kryeministër, ndërsa ky i fundit ka deklaruar se zgjedhjet vendore do të mbahen me 30 qershor dhe se në garë është i mirëpritur çdo subjekt politik. Opozita ka paralajmëruar se nuk do të tolerojë mbajtjen e ‘zgjedhjeve farsë’, ndërsa kryeministri ynë në çdo dalje publike kujton kodin penal dhe masën e dënimit me burg për prishësit e zgjedhjeve.
Discussion about this post