Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar për gjykim pesë persona të përfshirë në një ngjarje të rëndë kriminale të ndodhur më 7 dhjetor 2023 në qytetin e Fierit.
Dy vëllezërit, K.G. dhe A.G., akuzohen për veprat penale “Vrasje me paramendim” në bashkëpunim dhe “Mbajtja pa leje e armëve dhe municioneve luftarake”, parashikuar nga nenet 78/1, 25 dhe 278/1 të Kodit Penal. Sipas Prokurorisë, ata kanë qëlluar me armë zjarri drejt automjetit tip “Porsche Cayenne” të drejtuar nga shtetasi E.J., 41 vjeç, i cili ka humbur jetën në vendngjarje.
Po ashtu, tre persona të tjerë janë proceduar penalisht për përfshirje indirekte në ngjarje:
-
R.P., për veprën penale “Përkrahja e autorit të krimit” (neni 302/1),
-
A.L., për “Moskallëzim krimi” (neni 300),
-
E.Xh., për “Deklarim i rremë para oficerit të policisë gjyqësore” (neni 305/b).
Ngjarja ka ndodhur rreth orës 11:00 në lagjen “16 Prilli”, në rrugën “Kujtim Majaci”, ku viktima është qëlluar teksa ndodhej brenda mjetit të tij luksoz.
Prokuroria thekson se hetimet kanë qenë të plota dhe dinamike, duke përfshirë edhe përdorimin e metodave proaktive për zbardhjen e plotë të rrethanave dhe përfshirjes së personave të dyshuar.
Institucioni i akuzës shprehet i vendosur për të vijuar ndjekjen penale të çdo akti kriminal që cënon jetën dhe sigurinë publike.
