Prokuror kërkon rikthimin në qeli të ish kreut të Bandës së Durrësit, Lulzim Berisha, i liruar pak ditë më parë.
Sot Prokuroria e Apelit Durrës ka dorëzuar rekurs në Gjykatën e Lartë kundër vendimit të Gjykatës së Apelit Durrës, e cila vendosi lirimin me kusht për të dënuarin Berisha.
Sipas Prokurorisë së Apelit Durrës, “nuk legjitimohet vendimi i lirimit me kusht për shkak të natyrës së veprave të rënda penale; për shkak të uljes së pajustifikuar të kohës së denimit nga gjykatat për të dënuarin e burgosur për vepra të rënda penale; si edhe për shkak të llogarive jo të sakta për kohën e burgimit”.
Lirimi i Lulzim Berishës ka shkaktuar jo pak debate në politikën shqiptare, ndërsa Partia Demokratike kërkon me insistim shkarkimin e kryebashkiakut të Durrësit Vangjush Dako, i cili siç thuhet në vendimin e Gjykatës, ka dalë garant për punësimin e tij në institucionin që drejton.
