Protestuan para Drejtorisë së Policisë, lirohen 10 nga 16 të arrestuarit

Pas protestës së ditës së sotme, Policia shoqëroi në Komisariat 16 protestues 10 prej të cilëve sapo janë lënë të lirë.

Banorët e Astirit protestuan përpara godinës së Drejtorisë së Policisë Tiranë nga ku kërkuan lirimin e Dorian Protoduarit i cili u arrestua gjthashtu në orët e pasdtiës pasi kishte marrë pjesë në protestën e opozitës.

Ata gjithashtu kërkuan edhe lirimin e protestuesve të tjerë të cilët sipas tyre mbahen në qeli në mënyrë të padrejtë.

Mësohet se Protoduari nuk është në mesin e personave që janë lënë të lirë pasi masa ndaj tij do të jepet 72 orë pas ndalimit, ndërkohë familjarët dhe banorët e Astirit kanë deklaruar se protesta e tyre do të vijojë.

Bëhet me dije se në total janë 29 persona të proceduar penalisht 6 prej të cilëve janë shpallur në kërkim.

Njoftimi i Policisë:

Policia e Tiranës nën drejtimin e Prokurorisë së Rrethit Gjyqësor Tiranë ka arrestuar 6 shtetas, për veprime të dhunshme mbi institucionet Kushtetuese, mbi Policinë dhe për shkatërrimin e pronës gjatë zhvillimit të protestës së opozitës nga Partia Demokratike dhe Lëvizja Socialiste për Integrim, ditën e sotme para parlamentit.

Veprimet proceduriale janë kryer në bazë të një analize të pamjeve filmike, raport shërbimeve, si dhe provave të tjera të mbledhura nga grupi hetimor.

Janë proceduar në gjendje të lirë dhe 17 persona të tjerë, ndërsa 6 shtetas janë shpallur në kërkim.

Është proceduar penalisht gjithashtu shtetasi G.B., organizator i protestës.

Janë arrestuar për konsumimin e elementëve të veprave penale “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike” shtetasit:

– J.Gj., 24 vjeç, nga Shijaku;
– M.D., 24 vjeç, nga Mamurrasi;
– A.K., 20 vjeç, nga Rrësheni;
– B.D., 36 vjeç, nga Kavaja;
– E.M., 26 vjeç, nga Kavaja;
– D.P., 31 vjeç, nga Tirana.

Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme.

Materialet proceduriale do t’i referohen Prokurorisë së Rrethit Gjyqësor Tiranë, për veprime të mëtejshme.

(F.GJ/FAXWEB.AL)