Si funksionon sindikalizmi? Në Shqipëri, gjatë këtyre 30 viteve është bërë një farë pune, sipas kreut të Konfederatës së Sindikatave Kol Nikollaj. Bojkoti i protestave për 1 Majin është një lloj proteste, sipas tij. Megjithatë për Xhaxhiun, ai thotë se sheshet nuk kanë qenë bosh, pasi kanë qenë të zëna nga politikanët dhe ka ndërmend këtu, “kushtet e mira” të krijuara prej tyre, që i bëjnë shqiptarët të mos dalin në protestë. Sidoqoftë, për Nikollajn është një pezmatim kjo situatë, ku as mediet në pjesën më të madhe thotë ai, nuk i japin përherë zë këtyre problemeve, por vetëm në 1 Maj.
Sa për sindikatat, shton që është bërë një punë e mirë, duke e krahasuar me 30 vite më parë, duke e kthyer Konfederatën në një institucion, që shtrihet në të gjithë vendin dhe me mundësitë që ka adreson ose ngre probleme të punëtorëve. I pyetur nga Xhaxhiu pse qeveria nuk ka frikë nga sindikatat, Nikollaj përgjigjet që qeveria nuk ka frikë askënd, madje as popullin, i cili e zgjedh atë.
Xhaxhiu: Sa larg është post-adoleshenca e sindikatave shqiptare, në përmbushjen e misionit për të drejtat e punëtorëve? Sheshet duhet të ishin të mbushura, pse ka ndodhur ky bojkot?
Kol Nikollaj: Edhe Bojkoti është një lloj proteste, sheshet nuk ishin bosh, po të zëna nga politikanët që ‘qurraviten’ për një kryetar bashkie, ata politikanë që na kanë krijuar aq të mira sa nuk protestojmë sot.
Xhaxhiu: Si ndihet një president i Konfederatave të Sindikatave në një ditë të tillë?
Kol Nikollaj: Jo komod, i pezmatueshëm, përpiqemi çdo ditë ta përçojmë shpresën nëpërmjet strukturave tona që janë përditë me punëtorët. Ka shumë media që kujtohen vetëm në datën e 1 Majit.
Xhaxhiu: Si funksionon sindikalizmi?
Kol Nikollaj: Në këto 30 vite, është bërë një farë pune, pasi nuk ka qenë e lehtë, duke qenë se sindikata ka qenë politike. Është kthyer në një sindikatë moderne, që i mbron në mënyrë institucionale punëtorët. Sindikatat në Shqipëri i kanë larë duart me politikën, pavarësisht se fuqinë e kanë të dobët. Nga kultura e emancipimit që kemi, në 30 vite kemi të njëjtat kërkesa. Ne kemi qenë ndoshta më të dobët. Problemi tjetër është mungesa e demokratizimit të brendshëm të sindikatave, kemi bërë rregullore në sindikatën tonë. Sindikata është institucion. Unë kam 12 vite në krye të Konfederatës.
Xhaxhiu: Ju fitoni ngaqë jeni më i miri apo më të mirë se ju nuk ka?
Kol Nikollaj: Është një lloj investimi që ka bërë Konfederata, kemi disa vite që punojmë. Jo çdo kush mund të vijë menjëherë dhe ta ushtrojë funksionin.
Xhaxhiu: Cilat kanë qenë disa nga betejat e fituara të Konfederatës?
Kol Nikollaj: Më herët kemi bërë protesta në miniera, energjitikë, fasoneri, shërbime publike. Problemi më i madh që kemi arritur është që e kemi kthyer në një institucion Konfederatën, shtrihet në të gjithë territorin, ka strukturat në të gjithë vendin, është prezente dhe jep kontributin e saj.
Xhaxhiu: Si e bën këtë, me çfarë mekanizmi?
Kol Nikollaj: Përmes propozimeve të ndryshimeve ligjore, konsultave, debateve. Kemi një qendër trajnimi, ku bashkëpunojmë me dy universitete.
Xhaxhiu: Pse nuk ju ka frikë qeveria juve?
Kol Nikollaj: Nuk ka frikë askënd, jo vetëm ne, as popullin, ne pjesë e tij jemi. Nuk do shumë mend. Por as sindikatat nuk kanë frikë qeverinë.
Discussion about this post