Vendimet e qeverisë lidhur me ndryshimin e pagave janë publikuar së fundmi në Fletoren Zyrtare. Bëhet fjalë për ndryshimin e pagave për punonjësit buxhetorë të sektorëve të shëndetësisë, policisë dhe jo vetëm.
Veç kësaj, janë pasqyruar edhe shpërblimet për rastet e veçanta, të tilla si: shërbime specifike, diploma specializimi të caktuara.
Me Vendim të Këshillit të Ministrave përcaktohet se:
- për shërbimin e rojës 24-orësh pa ndërprerje mjeku rojë i parë merr 6.000 lekë shpërblim, mjeku i dytë 5.600 lekë, për një ditë të zakonshme, 7.000 dhe 6.400
- për ditët e shtuna dhe 8.000 dhe 7.600 përkatësisht për të dielat e festat.
- për natyrë të veçantë pune, mjekët e spitaleve në shërbimin e urgjencës, shërbimin e reanimacionit, shërbimin e hemodinamikës, në njësinë e aksidenteve cerebrale, mjekët neonatë, përfitojnë në masën 18.000 lekë në muaj;
- infermierët dhe laborantët e spitaleve në shërbimin e urgjencës, shërbimin e reanimacionit, shërbimin e hemodinamikës dhe në njësinë e aksidenteve cerebrale përfitojnë një shtesë 12.000 lekë në muaj
- për konsulta dhe ndërhyrje kirurgjikale në spitale të tjera, përfitojnë për çdo ditë shërbimi një shtesë në page: mjekët e institucioneve spitalore universitare 10.000 lekë; mjekët e spitaleve rajonale 5.000 lekë
Pagat e reja, shpërblimet dhe shtesat për natyrë të veçantë pune janë përcaktuar edhe për punonjësit e strukturave të Policisë së Shtetit.
- Kursantët që pranohen në Kolegjin e Policisë, në Akademinë e Sigurisë, gjatë periudhës së shkollimit përfitojnë trajtim me pagesë në masën 8.000 lekë në muaj
- Për periudhat e shkollimit/trajnimit që zgjasin më shumë se gjashtë muaj, gjatë periudhës së shkollimit/trajnimit duke filluar nga muaji i shtatë e në vazhdim, punonjësit i ndërpritet paga dhe i jepet një kompensim, në varësi të pjesëtarëve të familjes që ka në ngarkim: punonjësi pa ose me një pjesëtar të familjes në ngarkim, përfiton 40% të pagës bazë mujore për grade, që përfitonte përpara fillimit të kursit të shkollimit/trajnimit; punonjësi me më shumë se një pjesëtar të familjes në ngarkim, 50%
VKM përcakton pagat edhe të punonjësve në shërbimet ndihmëse, si shoferë, pastruese, arkivistë. Paga më e ulët për kategorinë e parë kalon nga 23.000 në 30.000 lekë.
(XH.A/SHUPLAKA)
