Kujtim Cakrani avokati i Agron Tufës ka folur në një lidhje telefonike me Fax News nga ku ka sqaruar se, vendimi i gjyqtarit ditën e sotme për pushimin e çështjes mes ish-kreut të Institutitë për Studimet e Krimeve të Komunizmit dhe deputetit Spartak Braho është i paligjshëm.
Cakrani tha se çështja do të apelohet dhe nga ana tjetër paralajmëroi një hetim ndaj gjyqtarit nëse ka lidhje sipas tij me Brahon apo me segmente politike.
“Nuk është një pushim për faktin se Tufa nuk kishte të drejtë na akuzat e tij apo Braho ka dalë i pafajshmëm për akuzat me të cilat akuzohet. Ky është një vendim për pushimin e çështjes pa prezencën e palëve. Ne kemi konstatuar disa shkelje, dhe e para ka të bëjë me faktin se nuk i ka thirrur palët, dhe e ka marrë vendimin pa prezencën e palëve. E dyta ka të bëjë me Sokol Paçon, ka marrë një vendim ku thotë se avokati i Tufës nuk legjitimohet me prokurën e posaçme me të cilën i paraqitet Gjykatës. Kjo nuk është e vërtetë, fakti që Tufa është jashtë Shqipërisë dhe përfaqësohet nga unë, nuk e bën të paligjshme.
Jemi duke e parë vendimin por shpresoj të mos ketë gabuar, nga ana tjetër konstatohet se Paço ka marrë një vendim kundër provave. Natyrisht ne do e apelojmë dhe do të nisim një hetim për llogari të detyrës dhe begraundin e tij nëse ka lidhje direkte me Brahon apo me parti politike. Ne të drejtën tonë të ligjshme e kemi që vendimin e sotëm ta apelojmë për 15 ditë. Nëse Gjykata e Apelit do ta kthejë sërish çështjen nuk ka pse e përjashton këtë gjyqtar, pasi caktohet automatikisht gjyqtar tjetër”, tha Cakrani për Fax News..
Kujtojmë se Gjykata e Tiranës ka vendosur që të pushojë çështjen në ngarkim të deputetit Spartak Braho, i cili akuzohet nga Agron Tufa për veprën penale të shpifjes.
Ky i fundit për shkak se ndodhet në azil në Zvicër i kishte dhënë prokurë përfaqësimi avokatit të tij Kujtim Cakrani, ndërsa ka pasur një ngërç procedurial, çka ka bërë gjykatësin Sokol Pasho që të pushojë çështjen.
(F.GJ/FAXWEB.AL)
