Vendimi i Qeverisë i marrë ditën e djeshme e çon pagën minimale në 24.000 lekë, duke vendosur për një rritje prej 2.000 lekësh, pas referencës zyrtare prej 22.000 lekësh që ka mbetur e pandryshuar prej 2013-ës.
Me vendimin e saj, qeveria përcakton që që për punonjësit që punojnë me kohë të pjesshme ose jashtë kohës normale të punës, është parashikuar edhe paga me orare që do të jetë 138 lekë për orë.
Deri më tani, një orë punë për punonjësit që nuk punojnë me kohë të plotë ishte 126 lekë për orë.
“Vendimi synon ruajtjen e nivelit të jetesës për të punësuarit si në sektorin privat dhe atë buxhetor. Rritja është në kufirin vjetor të inflacionit për vitet paraardhëse, të deklaruar nga INSTAT. Kjo gjë do të siguronte një stabilitet ekonomik dhe një nivel të qëndrueshëm jetese për punonjësit me të ardhura minimale”, citohet në vendim.
Me rritjen e pagës minimale, pritet që të rriten edhe kontributet për të punësuarit dhe të vetëpunësuarit. Shuma totale e kontributeve për të punësuarit me pagën e re minimale do të jetë 6696 lekë në muaj.
Ndërsa personat e vetëpunësuar (përjashtim bëjnë fermerët), kontributin e detyrueshëm për sigurimin e kujdesit shëndetësor do ta paguajnë 1632 lekë në muaj, nga 1496 lekë në muaj që paguajnë sot.
Pagesat e kontributit minimal janë përcaktuar edhe për personat e vetëpunësuar si shitës ambulant, ata që punojnë si punëtorë shtëpie, për të punësuarit në sektorin e fasonëve dhe për qytetarët që janë mbi 18 vjeç me të ardhura të rregullta nga pasuritë e paluajtshme dhe të luajtshme, por nuk kanë sigurim të detyrueshëm. Këta të fundit do të paguajnë një kontribut të detyrueshëm të sigurimeve shëndetësore me vlerë 1632 lekë.
(XH.A/SHUPLAKA)
Discussion about this post