Kryeministri Rama i është drejtuar me një gjuhë ashpër opozitës, për atë që sipas tij e quajti bllokimin që po i bëhet Reformës në Drejtësi. Duke folur nga Kuvendi për Vetingun ai u shpreh që është qesharake që Opozita kapet me çështjen e përkthimit. Ai paralajmëroi Opozitën se bllokimin që po i bën këtij procesi do ta paguajë rëndë në zgjedhjet e ardhshme.
‘’Për ju fajin e ka përkthyesi. Është qesharake, përkthimi i vetëm është që ju ku keni humbur rrugën. Shumica prej jush e ka gabim , ndërsa pjesa tjetër bëhet palë me ata që e kanë gabim. Shqiptarëve iu keni dalë para dhe i keni zënë rrugën i keni zënë rrugën Vettingut që pengon dhe integrimin e Shqipërisë’’, ka thënë Rama.
‘’A iu kam thënë që do vini ta votoni që të gjithë, do vini në rresht dhe do ta votoni, ashtu si votuat ndryshimet Kushtetuese pavarësisht se e votuat me dëshpërim. Ju nuk e ndaloni dot Reformën në Drejtësi dhe do ta pagani si frengu pulën në zgjedhjet e ardhshme. Po kjo nuk është diçka që më intereson më shumë sesa integrimi i vendit. Ju nuk keni lidhje me antishqiptarizmin po kjo që po bëni është antishqiptare. E bëni se jeni të trembur apo jo, po ska dyshim që ky është një akt antikombëtarr. Ti bësh sot pritë një vendi të tërë duke bllokuar negociatat kjo është kulmi’’, ka përfunduar fjalimin e tij Kryeministri.
