Kryeministri Edi Rama ka reaguar lidhur me përplasjen e fundit në Kosovë, ku ka marrë në mbrojtje Albin Kurtin, i cili së fundi ka rënë pre e akuzave nga Ramush Haradinaj, pas vendimit për të hequr pjeserisht taksën 100% ndaj mallrave serbe.
Rama shprehet se Kurti mund të jetë gjithçka, përveç se shërbëtori i Serbisë, ndërsa shton se reputacioni i Kosovës u dëmtua ndërkombëtarisht me vendosjen e taksës, dhe e nxori Serbinë si viktimë në sy të botës.
“Me paturpësi Ramushi ka nisur baltosjen e Albin Kurtit! Albini mund të jetë gjithçka po kurrë nuk është shërbëtor i Serbisë! Uroj të mos tutet prej sulmeve të ulëta për heqjen e taksës që shkatërroi reputacionin ndërkombëtar të Kosovës dhe viktimizoi Serbinë në sytë e botës!”, shkruan Rama në rrjetet sociale.
“Kurrë nuk është dëgjuar një idiotësi më e madhe se sa predikimi që taksa do sjellë njohjen e Kosovës nga Serbia dhe asgjë s’i ka bërë më shumë dëm Kosovës,se sa ajo taksë e kthyer nga një thirrje për vëmendje ndaj shkeljeve të CEFTA-s nga Serbia, në një litar në fytin e Kosovës!
Albin Kurti është në rrugën e duhur! Heqja e taksës do jetë dita e parë e tij si kryeministër në zyrë, jo më si lider opozite në zyrën e kryeministrit! Do t’i duhet të përballet me etiketën e “tradhëtarit” po ani, ajo etiketë i dallon udhëheqësit e paqes nga statujat e luftës”, shkruan më tej Rama në postimin e tij.
Disa ditë më parë Kurti vendosi që të hiqte pjesërisht taksën ndaj mallrave serbe, ndërsa kërkoi nga Serbia që ti japë fund fushatës së lobimit, për të hequr njohjen e Kosovës nga shtetet e tjera.
Ky vendim i Kurtit u kritikua publikisht nga Haradinaj, që ishte dhe ideator i taksës, duke e akuzuar kryeministrin aktual se po i shërben interesave serbe, duke qenë se presidenti Vuçiç, shumë shpejt do të përballet në zgjedhje dhe kërkon votat e qytetarëve.
(E.K/Faxweb.al)
