Rama përfundon drekën, del me Zahon në krahë, protestuesit ujë, vezë e patate në drejtim të tij

Pas rreth dy orësh, kryeministri Rama ka dalë nga ambientet e një restoranti pranë çadrës së Partisë Demokratike në “Sheshin e Lirisë”.

Kryeministri ka drekuar në shoqërinë e bashkëshortes dhe djalit të tyre, për të dalë më pas nga dera e pasme e restorantit.

Ai i ka përshëndetur me dorë protestuesit, ndërkohë që ata janë kthyer me shishe uji, vezë e patate të hedhura në largësi në drejtim të tij.

Gjithçka nisi rreth dy orë më parë teksa Edi Rama u pa të dilte nga Kryeministria e të kalonte përballë çadrës së opozitës për t’u drejtuar drejt një restoranti aty pranë.

Kreu i Qeverisë u shfaq papritur duke kaluar përballë çadrës së demokratëve, i shoqëruar nga 4 truproja. Në atë moment, protestuesit që e vunë re, reaguan menjëherë, fillimisht duke fishkëllyer.

“Rama ik, hajdut, kriminel”, thirrën ata.

Gjatë qëndrimit të tij me familjen në lokal, kryeministri “u rrethua” nga deputetët e kryebashkiakët e korruptuar, postera të opozitës. (XH.A/SHUPLAKA)