Më 17 janar, 549 vite nga vdekja e Heroit Kombëtar, Gjergj Kastriot Skënderbeut, kryeminisri Edi Rama i ka kushtuar një vend të veçantë në rubrikën e tij “Amarcord”.
Referuar historisë, kryeministri shkruan se 80 vite më parë, në 25 vjetorin e Pavarësisë, Shqipëria nuk dinte se si ta monumentalizonte heroin e madh për shkak të dimensionit të tij të pakapshëm.
Por sipas kreut të Qeverisë shqiptare, ç’mund të thuhet për Skënderbeun është shumë e thjeshtë. E për këtë, ai i referohet përkufizimit të vetë Heroit Kombëtar në letrën dërguar princit të Tarentit. Sipas kryeministrit Edi Rama, Skënderbeu është mishërimi i popullit që e ngjizi dhe e lartësoi.
Shkrimi i Ramës:
AMARCORD
80 vjet më parë, teksa po përgatitej të kremtonte 25-vjetorin e Pavarësisë, Shqipëria nuk e dinte ende mirë se si duhej monumentalizuar heroi i madh, Skënderbeu, në kujtesën kolektive, e cila gjithësesi nuk harron se ai ndërroi jetë në 17 janar.
Ekspozita e 1937-ës, e cila i ofroi publikut bocetet e përmendores së Skënderbeut (asnjë prej tyre nuk u realizua), dëshmon se sa i pakapshëm në dimensionin e tij të shumefishte, ishte ky personalitet. A ishte më shumë luftëtar apo diplomat(?), shtetndërtues apo legjendë e gjallë(?), histori apo mit(?)… Këto pikëpyetje vazhdojnë të përballin historianët, disa prej shumë skrupulozë e disa të tjerë fare pa skrupuj.
Ç’mund të thuhet sidoqoftë për Skënderbeun është në fakt shumë e thjeshtë: Ai është mishërimi i popullit që e ngjizi dhe e lartësoi dhe ishte siç përkufizohej vetë në letrën që i dërgonte ambiciozit, princit të Tarentit: “Çfarëdo që të ndodhë, unë do të jem mik i virtytit, jo i fatit”.
Ky është testamenti i vërtetë i Gjergj Kastriotit për shqiptarët, të cilët, sa herë që i janë qasur me bindje, nuk janë braktisur kurrë as nga virtuti dhe as nga fati.
(XH.A/SHUPLAKA)
