Infeksionisti Tritan Kalo ka deklaruar se rastet e njerëzve të prekur nga virusi i gripit po vijnë në rritje gjatë këtyre ditëve të ftohta të dimrit. Në një intervistë për “FaxNews”, ai ka sqaruar se arsyeja kryesore pse qytetarët preken lehtësisht nga gripi janë temperaturat e ftohta.
Sipas tij, trupi e ka më të vështirë të mësohet me këto temperature, duke i lënë rrugën të lirë virusit të gripit. “Stina e dimrit shoqërohet me infeksione kryesisht të rrugëve të sipërme respiratore që janë të tipit viral. Ato paraprijnë gripin, janë viruse të ngjashme me gripin.
Instituti i Shëndetit Publik lajmëron që tek ne janë izoluar viruset e gripit. Gripi ka një kurbë të rasteve që vijnë duke u rritur. Fundi i muajit mars, prill shënon edhe uljen apo zhdukjen e rasteve të gripit në Shqipëri. Njëkohësisht me gripin janë edhe mbi 70 viruse të ndryshëm që japin rrufë, me teshtitje, kollë, por nuk shoqërohen me dhimbjen e kokës e të muskujve që është karakteristikë për gripin.
Aryseja pse në këtë kohë favorizohet dhe shtohet numri se është se me uljen e temperaturave rrugët tona të frymëmarrjes atakohen nga ajri i ftothtë. Trupi e ka më të vështirë të përshtatet. Me uljen e tempraturave njerëzit lëvizin më pak, qëndrojnë në mjedise të mbvyllura, ku kanë më shumë kontakte me njerëzit dhe të përhapin viruset”, ka sqaruar mjeku.
Tritan Kalo foli edhe për vaksinimin kundër gripit. Ai këshilloi që, edhe pse ka nisur sezoni i gripit, njerëzit janë ende në kohë të bëjnë vaksinat sepse në këtë mënyrë do ta kalojnë më lehtë virusin.
“Akoma jemi në fillimet e rasteve me grip, vaksinimi ndaj tij është gjithmonë i këshillueshëm. Ende është aktual një vaksinë. Vaksina e gripit nuk është 100% efektive, por personat që janë të vaksinuar do ta kalojnë gripin me shenja të lehta. Grupet e riskuara do të jenë ata që vuajnë nga sëmundjet kronike, moshat ekstreme”, u shpreh infeksionisti Kalo.
Ai e ndali theksin edhe tek moshat që preken më lehtë nga gripi. Sipas tij, moshat nën 5 vjeç dhe mbi 60 vjeç janë më delikatet.
“Trendi i pacientëve është thuajse i njëjtë në krahasim me vitin e kaluar. Numri i tyre është në rritje gjithmonë, por është në të njëjtat shifra me vitin e kaluar. Për vaksinimin është folur shumë, është krijuar mundësia që të zgjerohet numri i pacientëve që përfitojnë falas dhe njerëzit janë më të ndërgjegjësuar. Për gripin këshillohet që vaksina të merret mbi moshën 2-vjeçare. Sëmundjet stinore gjithmonë prekin ose moshën nën 5 vjeç, ose ata mbi 60 vjeç”, tha Tritan Kalo për “FaxNews”.
Ai iu drejtoi një thirrje njerëzve që të mos i ndërpresin kurat që ju japin mjekët sepse në këtë mënyrë sëmundja thjesht sa agravohet më shumë.
(M. I./ Faxweb.al)
