Partia Demokratike ka reaguar në mënyrë të drejtpërdrejtë ndaj asaj që e cilëson si heshtje të pajustifikuar të Prokurorisë së Posaçme (SPAK) për disa çështje të rëndësishme që lidhen me korrupsionin dhe procesin zgjedhor në vend.
Në deklaratën e publikuar, PD kritikon SPAK për mungesën e rezultateve konkrete në hetimin e aferës së inceneratorëve, duke theksuar se ende nuk është rekuperuar asnjë shumë nga 150 milionë euro të dyshuara si të keqpërdorura.
Gjithashtu, Partia Demokratike ngre shqetësimin për përfshirjen e grupeve kriminale në disa qytete të mëdha të vendit, që sipas saj, po përpiqen të ndikojnë në procesin zgjedhor.
Ndërkaq, PD ndërlidh këto zhvillime me skandalin ndërkombëtar McGonigal dhe rolin që ajo thotë se ka pasur kryeministri Rama në këtë çështje.
Në këtë kontekst, theksohet se kontrata me një avokat amerikan, i lidhur më parë me Presidentin Trump, është bërë në përputhje të plotë me ligjet në fuqi dhe është regjistruar sipas kërkesave të sistemit FARA në SHBA.
Në deklaratë vlerësohet mbështetja e komunitetit shqiptaro-amerikan dhe diaspora, duke e cilësuar atë si një faktor kyç në angazhimin për një proces zgjedhor të ndershëm dhe demokratik.
Partia Demokratike shpreh bindjen se mbështetja popullore për ndryshim është në rritje dhe u bën thirrje anëtarëve dhe mbështetësve të saj që të angazhohen fuqishëm në dy javët e fundit të fushatës elektorale.
Ky reagim vjen në një moment të ndjeshëm politik, kur forcat politike janë në përgatitjet përfundimtare për zgjedhjet që do të mbahen më 11 maj.
Reagimi i Partisë Demokratike:
Pasi e përdori SPAK për vite me radhë si kapak për pusetën e skandalit të tij me McGonigal, sot Rama ka zgjuar sërish nga gjumi ata që kanë mbyllur sytë teksa kartelët e drogës në Tiranë, Durrës, Elbasan dhe Shkodër janë përfshirë më fort se kurrë për të deformuar vullnetin e zgjedhësve, njëlloj siç mbyllën veshët para audiove të dosjeve 339 dhe 184! Njëlloj siç kanë mbyllur sytë para 150 milionë eurove të vjedhura të inceneratorëve, nga të cilat SPAK jo vetëm nuk ka rekuperuar asnjë qindarkë, por hesht si fija e barit se ku kanë përfunduar 150 milionë euro për një vepër që nuk ekziston. Mesa duket kontrata e PD me avokatin e Presidentit Trump nuk ka trembur vetëm Ramën, por dhe veglat e tij. Në fakt, jo pa të drejtë! Pasi sot denoncimet e saj për McGonigal, përzierjen e karteleve të drogës të mbështetur nga Edi Rama dhe narkopolicia në procesin zgjedhor, përfshirë bashkëpunimin e heshtur të organeve të drejtësisë, kanë veshin e administratës dhe Kongresit të SHBA!
Partia Demokratike është transparente për kontratën me avokatin e Presidentit Trump, e cila është nënshkruar në përputhje të plotë me ligjet e të dyja vendeve dhe depozituar në FARA sipas çdo rregulli! Partia Demokratike gjen dhe njëherë rastin të falënderojë patriotët e komunitetit shqiptaro-amerikan për bujarinë dhe ndihmën e pakursyer për çmontimin e regjimit të Edi Ramës!
Sot Partia Demokratike, falë diasporës, është më e fortë se kurrë! Ditët e Ramës janë të numëruara! Fitorja është afër dhe i bëjmë thirrje të gjithë demokratëve brenda dhe jashtë Shqipërisë të angazhohen fuqimisht në dy javët e mbetura të kësaj fushate për të realizuar qëllimin tonë final që është Shqipëria Madhështore!
