Disa orë pas arrestimit të Drejtorit të Burgut të Durrësit Astrit Kotaj, i cili akuzohet për “shpërdorim detyre” dhe “falsifikim dokumentash” për lirimin e Lulzim Berishës, ka reaguar avokati i tij.
Avokati Ahmet Cani e konsideron ndalimin e Kotajt si të jashtëligjshëm dhe me motive politike.
“Klienti im ka qenë ditën e djeshme në Prokurorinë Durrës ku ka dhënë çdo shpjegim të kërkuar. Prokuroria Durrës në mënyrë të fshehtë ka kërkuar pranë Gjykatës marrjen e masës me arrest kur kjo ndodh vetëm në rastet kur personi i fshihet drejtësisë ose nuk mund të gjendet”, ka deklaruar Cani.
Ndër të tjera Cani shton se lirimi i ish kreut të Bandës së Durrësit, nuk ka të bëjë aspak me Kotajn, por me veprimet e parregullta të gjykatës dhe të prokurorisë.
“Lulzim Berisha është liruar në absurd nga Gjykata & Prokuroria që ka pas detyrën e verifikimit të uljes së viteve të dënimit, për prapavije politike dhe për të mbuluar gabimet e saj bën arrestimin e klientit tim krejtësisht të pafajshëm. Absurd, show politik, që duan të bëjnë me një funksionar publik, për t’i shërbyer qarqeve të caktuara”, shton avokati.
Pak orë më parë, Ministri Ylli Manjani e shkarkoi Kotajn nga detyra, dhe i bëri thirrje Prokurorisë që të zbardhë të vërtetën. (D.D/Shuplaka)
Discussion about this post