Komisioni i Ligjeve në Kuvend miratoi sot projekt-ligjin për rikthimin basteve sportive online. Ky projekt-ligj ka hapur mjaft debate në vend dhe shumë zëra kanë qenë kundër, madje edhe nga rradhët e socialistëve.
Për të folur për këtë problematikë, ishte i ftuar në Fax News më gazetaren Rovena Neziri, eksperti i ekonomisë Enriko Ceko. Ai u shpreh se pas 10 vitesh në pushtet kjo mazhorancë ka mungesë idesh se si të gjenerojë para në buxhetin e shtetit dhe prandaj i është rikthyer basteve sportive.
Enriko Ceko: “Është shumë e vërtetë ka një rikthim të kësaj çështjeje. Në momentin kur kjo klasë politike erdhi në pushtet para 10 vitesh e ndaloi këtë lloj veprimtarie. Do ta shikoja edhe me disa lëvizje të tjera që janë bërë, për vendosjen e taksës së banesës, për siguracionin e banesave, për shtimin e TVSH-së për veprimtarinë arsimore etj. Kjo tregon faktikisht që kjo qeveri i ka ezaururar të gjitha mënyrat e mundshme për të futur para në buxhetin e shtetit. Dhe është më se e kuptueshme që pas 10 vitesh në pushtet, çdo lloj qeverisjeje do ketë rrjedhjet e saj si në aspektin e korrupsionit, ashtu dhe në mungesën e alternativave të zhvillimit, ashtu në mungesën e ideve për të gjeneruar para në buxhetin e shtetit, për të përmirësuar cilësinë e jetës së qytetarëve, për të përmbushur objektivat e mijëvjeçarit të zhvillimit të qëndrueshëm etj,” tha Ceko.
Sipas Cekos kjo veprimtari më parë drejtohej nga krimi i organizuar dhe shumë vrasje që kanë ndodhur vitet e fundit kanë qenë përplasje mes bandave që kontrollojnë këtë treg.
Enriko Ceko: “N.q.s sot jemi në një situatë të tillë kur teknologjia bën të mundur kontrollin e të gjithë transaksioneve online. Nëse shohim veprimtarinë kriminale vitet e fundit do të shohim përplasje mes bandave, që më përpara ishin ato që kontrollonin tregun e lojërave të fatit. Mesa duket është arritur në një marrëveshje të heshtur mes tyre se kush do e kontrollojë tregun”, shtoi eksperti.
Ceko u shpreh gjithashtu se është e dyshimtë se kush do t’i kontrollojë këto baste tani dhe kujt do t’i jepen licensat.
Enriko Ceko: “Një treg qindra miliona euro dhe do jepen disa licensa, por puna është se kush do i marrë këto licenca. Nga ana sociale në Shqipëri nuk është se lojërat e fatit konceptohen si mjet jetese për të kaluar kohën e lirë, dhe për të shpenzuar 200 euro. Këtu po kanalizohet vetëm tek kazinot online te bastet sportive dhe kaq. Është krijuar varësi ndaj këtyre lojërave saqë edhe vetë individët edhe familjarët janë të shqetësuar për këto lojëra”, u shpreh Ceko.
Discussion about this post