Fushata e ish-kandidates demokrate për Presidente, Hillary Clinton bëri të ditur se do të marrë pjesë në një rinumërim votash, që ka ndërmarrë ish-kandidatja e Partisë së Gjelbër, Jill Stein në shtetin qendror të Visconsit. Juristi i fushatës së zonjës Clinton, Marc Elias u shpreh të shtunën në faqen Medium.com se vendimi vjen pasi fushata e zonjës Clinton, mori qindra kërkesa për ta bërë një gjë të tillë. Zoti Elias konfirmoi se kërkesat e bindën fushatën që të fillojë të mbledhë informacion nëse kishte pasur “ndërhyrje nga jashtë” në rezultatet e zgjedhjeve të 8 nëntorit.
Presidenti i zgjedhur amerikan, Donald Trump, tha se rinumërimi është “mashtrim”. Në deklaratën e tij, zoti Trump tha se rinumërimi është “mashtrim nga Partia e Gjelbër për zgjedhjet, në të cilat është pranuar disfata”. “Rezultatet e këtyre zgjedhjeve duhet të respektohen e jo të sfidohen dhe abuzohen”, tha Trump. Nga ana tjetër, Marc Elias, këshilltar i kandidates demokrate për presidente amerikane, Hillary Clinton, tha se fushata nuk ka gjetur asnjë shenjë të sulmit kibernetik në sistemin votues, por do të marrë pjesë në rinumërim, “me qëllim që të ketë siguri se procesi vazhdon në mënyrë që është korrekte për të gjitha palët”. Dallimi në vota tregon se është pothuajse e pamundshme që çfarëdo rinumërimi do t’i sillte zonjës Clinton fitore në të tri shtetet, që eventualisht do ta ndryshonin rezultatin e zgjedhjeve presidenciale në Shtetet e Bashkuara.
