Ambasadorja e BE-së Romana Vlahutin është në muajt e fundit të qëndrimit të saj në vendin tonë, si përfaqësuese e BE-së. Mandati i saj do të përfundojë më 31 gusht 2018.
Kjo do të thotë se Vlahutin nuk arriti dot të shtyjë me një vit mandatin e saj në Tiranë gjë të cilën ajo e kërkoi formalisht.
Shërbimi i Jashtëm i BE-së (EEAS) e konfirmoi këtë fakt për “Exit.al”, në përgjigje të një kërkese të bërë në bazë të të drejtës për liri të informacionit.
Ndërkohë, BE kishte shpallur që para një viti aplikimin për vendin e kreut të Delegacionit në Tirana. Sipas letrës së kreut të Divizionit për Çështjet Parlamentare të EEAS, afati i fundit për aplikim për pozicionin e ambasadorit të BE-së në Shqipëri ishte më 20 shtator 2017. Nuk dihet nëse BE e ka përgjedhur tashmë kryen e ri të delegacionit dhe se kur ajo apo ai do të lajmërohet publikisht si zëvendësues i Vlahutinit.
Gjatë kohës që ka shërbyer në Shqipëri, statusi i diplomates që Vlahtuin gëzon në shërbimin diplomatik në Kroaci ka qënë i ngrirë, çfarë do të thotë se ajo mund t’i rikthehet karrierës së saj diplomatike në Kroaci. Vlahutin ka shërbyer për rreth 9 vjet si diplomate në Kroaci, duke arritur të ngrihet deri në nivelin e numrit dy të ambasadës së Kroacisë në Beograd.
Ka shumë pak gjasa që Vlahutin të vazhdojë karrierën e saj në shërbim të EEAS apo të Komisionit Evropian, duke qënë se ajo ishte emërim politik i Kroacisë, si përmbushje e dy kutoave të emërimeve politike që BE i dha Kroacisë mbasi ajo u bë anëtare e BE-së.
Si rezultat, është e sigurtë që Vlahutin nuk do të luaj më asnjë rol në procesin e integrimit të Shqipërisë./Exit.al
Discussion about this post