Rrëzimi i dekretit të Metës nga KQZ, reagon PD: Mos u habisni, jemi në ‘Fermën e kafshëve”

Refuzimi i KQZ-së për të zbatuar dekretin e Presidentit Meta ku shfuqizohej data 30 qershor si datë e zgjedhjeve, ka sjellë dhe reagimin e PD-së.

Sekretari i Përgjithshëm i kësaj partie, Gazment Bardhi ka ironizuar këtë vendim të anëtarëve të KQZ-së duke i kërkuar popullit të mos habitet.
“Mos u habisni! Mos u skandalizoni nga shpërdorimi i turpshëm që po i bëjnë detyrës disa anëtarë militantë të PS në KQZ!

Këta që marrin përsipër të shqyrtojnë dhe të refuzojnë një dekret presidencial, janë ekzaktësisht të njëjtët militantë që pohuan përpara Gjykatës Kushtetuese se Kushtetuta mund të ndryshohet edhe me vendim qeverie”, shkruan Bardhi në FB.

Sipas tij: “Në shtetin e Edi Ramës, të ndërtuar sipas modelit orëellian të Fermës së Kafshëve, mjafton vetëm Partia Socialiste dhe Edi Rama!

Kjo është e papranueshme dhe shqiptarët nuk kanë për ta pranuar kurrë! “Edi Rama mirë, gjithë të tjerët keq” ka marrë fund që më 16 Shkurt!”