Sekuestrohen 77 kilogramë drogë në Qafë-Thanë, arrestohen 2 bullgarë (VIDEO)

77 kilogramë lëndë narkotike “Cannabis sativa” janë gjetur dhe sekuestruar gjatë një kontrolli të ushtruar nga Policia Kufitare në Qafë-Thanë.

Gjatë aksionit është kryer edhe arrestimi i dy shtetasve bullgarë, të identifikuar si Neven Milenov 39 vjeç dhe Shaban Daud 55 vjeç. Ndërkohë që është shpallur në kërkim shqiptari me iniciale A. G. 45 vjeç.

Bëhet e ditur se droga u gjet dhe sekuestrua në automjetin e bullgarit Milenov, e fshehur në dyshemenë e mjetit, ku u gjet e ndarë në 22 pako.

Detaje të Policisë së Korçës:

Policia Kufitare godet një tjetër tentativë të trafikut ndërkombëtar të lëndëve narkotike.

Sekuestrohen 22 pako me peshë 77 KG lëndë e dyshuar narkotike Cannabis Sativa. Arrestohen në flagrancë dy shtetas bullgarë që transportonin lëndën narkotike, si edhe shpallet në kërkim një shtetas shqiptar i dyshuar si bashkëpunëtor i tyre.

Shërbimet e Stacionit të Policisë Kufitare në Qafë-Thanë, në bashkëpunim me Specialistët e Seksionit për Narkotikët në Drejtorinë Vendore të Policisë Korçë, bënë kapjen dhe arrestimin në flagrancë të shtetasve:

Neven Milenov, 39 vjeç, banues në Razgrad-Bullgari. Shaban Daud, 55 vjeç, banues në Silistra-Bullgari. Si edhe u bë shpallja në kërkim policor e shtetasit A.G, 45 vjeç (të dhëna të tjera nuk jepen për shkak të hetimeve).

Më datë 23.05.2017 në dalje të Republikës së Shqipërisë, janë paraqitur shtetasit e mësipërm, me një mjet furgon tip “Volkswagen” me targa CC6971AH, të cilin e drejtonte shtetasi Neven Milenov.

Nisur nga dyshimet e shfaqura, ky mjet u përzgjodh nga shërbimet e Policisë Kufitare, për verifikim në vijën e dytë. Gjatë kontrollit në skaner, u shfaqën dyshime se në këtë mjet, mund të ishte fshehur lëndë narkotike. Konkretisht në pjesën e dyshemesë, në një vend të përshtatur u gjetën dhe sekuestruan në cilësinë e provës materiale:

22 pako të mbështjella me letër natriban me peshë 77 kg lëndë e dyshuar si narkotike Cannabis Sativa

Veprimet proceduriale të rastit, u kryhen nga Specialistët e Seksionit për Narkotikët, në Drejtorinë Vendore të Policisë Korçë.

Materialet i kaluan Prokurorisë të Krimeve të Rënda në Tiranë për veprën penale “Trafikimi i narkotikëve kryer në bashkëpunim, mbetur në tentativë”parashikuar nga nenet 283/a/2/ e 22 të Kodit Penal.

(XH.A/SHUPLAKA)