Prej muajsh tashmë një pjesë e banorë të zonës dhe aktivistë nga Tirana kanë nisur protestën në Tropojë kundër ndërtimit të disa HEC-ve në lumin Valbonë.
Reagimi është shtuar sidomos pas vendimit të Gjykatës Administrative e cila lejoi punimet. Gjykata e ka cilësuar të ligjshëm ndërtimin e HEC-eve në Valbonë. Sipas vendimit, punimet për ndërtimin e HEC-eve do të vazhdojnë.
Të ftuar në ‘’Fax News” dy prej aktivistëve dhe pjesëmarrësve në këto protesta u shprehën se banorët e zonës janë të presionuar nga ana e qeverive, dhe për këtë shkak nuk dalin as në protesta.
“Banorët përherë kanë qenë kundër ndërtimeve të HEC-eve, edhe pse kanë pak frikë nga mësymja e shtetit. Kjo pasi banorët mbahen nga disa bujtina që kanë aty. Ne nuk po bëjmë dot rikonstruksionin e shtëpive, shkojmë për të marrë leje dhe nuk na japin dot, ndërsa tani bëhet ky shkatërrim”, u shpreh Kelmend Selimaj.
‘’Nesër rreth orës 11 ne do të mblidhemi në ‘’Parkun rinia” dhe do të marshojmë drejt Kryeministrisë. Shpresoj që nesër ne do të tërheqim edhe vëmendjen e politikanëve, në mënyrë që të ketë një reagim dhe ata të tërhiqen nga projekti”, u shpreh një tjetër aktivist.
‘’Ne kemi pasur njerëz nga e gjithë bota që kanë ardhur për turizëm në Valbonë, të gjithë këta kur kanë parë makineritë dhe na kanë thënë ‘’çfarë po ndodh?”, kur iu kemi thënë, ‘’jooo thonë s’ka mundësi”. Sidomos turistët e huaj janë shprehur të gatshëm duke na thënë sesi mund të na ndihmojnë dhe ku mund të ngrejmë zërin”, u shpreh më tej banori i zonës Selimaj.
‘’Valbona ka vlera të veçanta, jo më kot është shpallur edhe zonë e mbrojtur”, u shprehën mes të tjerash aktivistët.
(E.K/Faxweb)
