Shkatërrohet rrjeti i drogës Shqipëri-Greqi, arrestohen 4 shqiptarë dhe 2 grekë

Një operacion anti-drogë i policisë greke ka çuar në arrestimin e katër shtetasve shqiptarë dhe dy grekë.

Sipas mediave helene, operacioni është zhvilluar në qytete të ndryshme të vendit fqinj, në bashkëpunim me policinë gjermane, me qellim shkatërrimin e një rrjeti ndërkombëtar të trafikut të kanabisit.

Operacioni ka nisur në portin e Igumenicës ku u zbuluan rreth 213 kg kanabis të fshehura mes një ngarkese me mobilje dhe djathë, në një furgon frigorifer që do të udhëtonte për në Itali me tragetin e linjës.

U vunë në pranga dy drejtuesit grekë të furgonit ndërsa nga hetimet u zbuluan dhe u arrestuan edhe 4 shtetas shqiptarë, ndërsa një pjesëtar tjetër i grupit kriminal është arrestuar në Gjermani.

Rrjeti dyshohet se transportonte drogë nga Shqipëria në Greqi, dhe më pas drejt shteteve të tjera të Bashkimit Europian. (A.R/SHUPLAKA)