Partia Demokratike iu ka drejtuar 5 pyetje qeverisë dhe Bashkisë së Krujës për pallatet e shembura nga tërmeti i 26 Nëntorit. Në shkresën që PD ka dorëzuar, demokratët kërkojnë sqarime për verifikimet e kryera tek dy pallatet e shembura në Thumanë.
Po ashtu, PD kërkon të dijë nëse pas tërmetit të 21 shtatorit janë lajmëruar banorët se pallatet tek të cilat jetonin, përbënin risk. Kërkesa mban firmën e Sekretarit të Përgjithshëm të PD, Gazment Bardhi. Në të kërkohet informacion edhe për personat përgjegjës që kanë lejuar banorët të futen brenda në banesat e dëmtuara pas tërmetit 6.4 ballë.
Shkresa e plotë e PD për qeverinë dhe Bashkinë e Krujës:
Pas heshtjes së Qeverisë për pyetjet tona publike, Sekretari i Përgjithshëm i PD z. Gazment Bardhi, i drejtohet me kërkesë zyrtare për informacion Qeverisë dhe Bashkisë Krujë, për 5 çështjet e mëposhtme:
- Pas tërmetit të datës 21 Shtator 2019, a ka kërkuar zyrtarisht dhe a ka kryer Bashkia Krujë verifikimin e sigurisë dhe gjendjes së dy pallateve të shkatërruara në Thumanë nga tërmeti i datës 26 Nëntor 2019? Nëse po, ju lutem na vini në dispozicion dokumentin zyrtar që e provon këtë. A është informuar ose raportuar pranë Komitetit Ndërministror të Emergjencave Civile (KNEC) për gjendjen e këtyre pallateve?
- A u verifikuan dy pallatet në Thumanë pas tërmetit të 21 Shtatorit? Nëse po, kush janë ekspertët që u angazhuan dhe çfarë vlerësimi bënë ata? Lutemi një kopje të aktit të konstatimit/verifikimit të hartuar dhe nënshkruar prej tyre.
- A u lajmëruan banorët për gjetjet e ekspertimit/verifikimit?
4. Nëse godinat ishin vlerësuar si të rrezikshme, çfarë masash u morën për strehimin e banorëve dhe ndalimin e hyrjes në ato banesa?
5. Kush lejoi futjen e banorëve në pallatet e shembura në 26 Nëntor 2019 dhe mbi çfarë bazë u bë kjo?
(M. I./ Faxweb.al)
Discussion about this post