Shpejtësia dhe lagështira në rrugë, shkaku kryesor i aksidentit të mjeteve pranë Pogradecit

Një aksident i rëndë u shënua në aksin rrugor Pogradec-Qafë Thanë, në afërsi të fshatit Pojskë.

Burime të siguruara bëjnë me dije se mjeti tip “Opel” dhe mjeti tip “Toyota” kanë qenë duke udhëtuar nga Pogradeci në drejtim të Qafë Thanës. Ndërkohë që mjeti furgon “Benz” po lëvizte nga Qafë Thana në drejtim të Pogradecit.

Ka qenë mjeti tip furgon ai që ka sjellë përplasjen me dy mjetet e tjera, kjo edhe për shkak të shpejtësisë por edhe të lagështirës në rrugë, çka ka sjellë spostimin e furgonit në krahun tjetër të rrugës. Spostim ky që ka shkatuar edhe goditjen e dy mjeteve që vinin nga Pogradeci.

Nga goditja e tre mjeteve, bëjnë me dije burime nga policia rrugore, janë plagosur 6 shtetas, 2 prej të cilëve në gjendje të rëndë, por jashtë rrezikut për jetën.

Policia në vendin e ngjarjes po kryen veprimet për zbardhjen e plotë të shkaqeve të këtij aksidenti të rëndë.