Pas deklaratave të forta të kreut të opozitës Lulzim Basha nga protesta e sotme, reagon Ministri i Punëve të Jashtme, Ditmir Bushati.
Sipas ministrit, thirrjet e Bashës synojnë të bllokojnë Reformën në Drejtësi, ndërsa kërkesa për krijimin e një qeverie teknike nuk është as logjike.
“Thirrjet për destabilitet për të bllokuar Reformën në Drejtësi. Thirrjet për kaos nuk nderojnë askënd aq më tepër kreun e opozitës. Kërkesa e PD për qeveri teknike është jo politike e jo logjike. PD me një qëndrim të pakuptueshëm, synon bllokimin e Vettingut”, reagon Bushati.
Pak orë më parë, nga “Çadra e lirisë”e vendosur përballë Kryeministrisë, Basha ka folur për luftë ndërsa iu ka bërë thirrje qytetarëve të reagojnë dhunshëm ndaj padrejtësive.
“Kushdo që godet qytetarët dhe protestën, do të vijë ora t’i marrim zvarrë në këtë shesh. Doni luftë, luftë do të ketë. Shpojuani gomat e makinës, thyejuani xhamat, atyre që ju ndëshkojnë pa të drejtë. Kush luan me popullin t’i bëjë llogaritë mirë, se ndryshe vala popullore do t’i fshijë nga zyrat. Kjo është një lëvizje popullore pa kthim, nuk është një manifestim partiak. Populli nuk mund të durojë më. Durimit të popullit i ka ardhur fundi, edhe durimit tonë. Boll me akte të paligjshme në kurriz të shqiptarëve, në kurriz të biznesit, por vjen momenti kur nuk do të gjeni vrimë miu për t’u futur, kur zemërata popullore të rritet. Kur ju godasin, mos ktheni faqen tjetër, por goditini me grusht. Për çdo padrejtësi goditini me grusht, koha kur populli trajtohet si dele po merr fund”, tha kreu i opozitës. (D.D/Shuplaka)
Discussion about this post