‘’Asgjë nuk do të jetë më si më parë’’, kështu shprehej dje Kreu i opozitës Lulzim Basha pas takimit me kryeministrin Rama dhe gjetjes së marrëveshjes.
Mirëpo kjo shtyrje e zgjedhjeve nuk parashikohet në kushtetutë dhe forcat politike do të duhet të mblidhen në seancë të jashtëzakonshme në Kuvend.
Për dy nga ekspertët e çështjes së zgjedhjeve Kristaq Kume dhe Çlirim Gjata, e vetmja zgjidhje është të ndërhyhet në Kushtetutë.
“Nuk ka asnjë zgjidhje ligjore për këtë. As Presidenti nuk e gjen dot bazën ligjore për të caktuar datën tjetër. Pra nuk ka ligj për këtë. E vetmja zgjidhje është esktraligjore. Sepse as Nishani as Meta nesër nuk gjejnë dot bazë ligjore për këtë. E vetmja zgjidhje është që n.q.s bien listat, Presidenti, ose Nishani ose Meta, apo të dy bashkë të detyrojnë partitë të bëjnë një marrëveshje politike”, sqaron Çlirim Gjata duke shtuar më tej se:
“E vetmja zgjidhje është kompromisi politik, vajtja në seancë të jashtëzakonshme në Parlament për miratimin e Kodit Zgjedhor. Pastaj sesi arrihet tek kompromisi politik, kjo është lojë politike pastaj. Unë jam jurist, është aritmetikë.
Një sqarim e bën dhe Kristaq Kume. Sipas tij në çdo rast duhet ndërhyrja në Kushtetutë.
“Nëqoftëse do të bihet dakort që zgjedhjet pas kësaj të bëhen jo përpara shtatorit të ardhshëm, por dhe pas datës 9 Shtator, por dhe pas kësaj date, datë kur mbaron mandati i Kuvendit aktual duhet të ndërhyhet në Kushtetutën e Shqipërisë.
Mund të ndërhyhet jo në një mënyrë, por në disa. Mundet ose të ndërhyhet duke vendosur një dispozitë të përkohshme që rregullon këtë problem, sepse kemi precedent të këtij lloji në Kushtetutën e vendit tonë, ose mund të gjendet zgjidhje tjetër, po prapë në Kushtetutë. Por nëse partitë bien dakort në tavolinë, çdo zgjidhje vjen duke shkuar në Kuvendin e Shqipërisë.
Nqs duhet ndërhyrë në Kodin Zgjedhor duhet shumicë e cilësuar, nëse duhet në Kushtetutë duhen më shumë sic është parashikuar. Por për mendimin tim nuk është problemi bëhet ose jo një shumicë e tillë, sa kohë që zgjidhja të mos jetë vetëm nga njëri kah, i maxhorancës, por pozitë-opozitë”.
Neni në Kodin Zgjedhor tek nenet mbi Datën e Zgjedhjeve ku nuk flitet në asnjë pikë për rastin e shtyrjes së datës së zgjedhjeve.
“Data e zgjedhjeve” është data e votimit, e caktuar me dekret të Presidentit të Republikës. (E.K/SHUPLAKA)
