Kryetar organizatës socialiste numër 4502 dhe drejtues i rinisë në lëvizjen Zgjidhja për rajonin Fier, Vlorë dhe Gjirokastër, Elton Lutaj, ka reaguar ndaj shkarkimit nga detyra të Sadrit Danaj, kryetar i Këshillit të Qarkut të Vlorës.
Përveç analizës mbi shkarkimin e dyshimtë dhe jashtë rendit të ditës së Danajt, ai dënon dhunën fizike të ushtruar nga truproja e ministrit Gjiknuri dhe policave bashkiakë ndaj tij.
Lutaj parashtron argumentat që sipas tij argumentojnë pse shkarkimi i Danajt dhe emërimi i kryetarit të ri është antiligjor.
Argumentet e socialistit vlonjat
“Akt kamikaz ndaj votës së lirë!
Skenë live, me zë e me figurë, sesi paturpësisht dhe pamoralisht bëhët kurban ligji për interesa të paqarta të Maliqit. Shkarkohet përdhunshëm , në shkelje të plotë të procedurës ligjore Sadrit Danaj, Kryetari i Këshillit te Qarkut Vlorë. Motivacioni:sepse ai mbështet tezat e lëvizjes “Zgjidhja”! Sepse Sadriti, si mijëra socialistë të tjerë, mendon se deputetët duhet t’i zgjedhë populli, jo kryetari i partisë; se duhet të ketë primare për zgjedhjen e përfaqësuesve brenda partive politike; se është ligji ai që duhet të drejtojë punën publike e të qeverisë etj…
Mirëpo kryetarët e mendojnë ndryshe dhe kësisoj në “Olimp” është vendosur se Sadriti duhet të shkarkohet. I vetëm përballë një tufe qehallarësh të pushtetit që sot vetëquhen Partia Socialiste, nuk i lejohet të ketë komisionerë, nuk i lejohet të shohë votat, madje dhe kur kamerat fokusojnë një votë të pavlefshme dhe Kryetari i Komisionit e pranon pavlefshmërinë e saj, cënohet fizikisht nga truproja i ministrit Gjiknuri.
Për më tepër emërimi i Kryetarit të ri z. Ervis Moçka është haptazi antiligjor pasi neni 74 i Ligjit për Vetëqeverisjen vendore të miratuar nga kjo qeveri në vitin 2015 thotë: Në rastin e krijimit të vendit vakant, që lidhet me humbjen e mandatit të anëtarit të këshillit të qarkut nga një anëtar i këshillit të një bashkie, ai zëvendësohet nga këshilli bashkiak përkatës, duke respektuar ligjin për barazinë gjinore.
Neni 76 i Ligjit për Vetqeverisjen vendore të miratuar nga kjo qeveri ne vitin 2015 thotë: Pika 5. Thirrja e mbledhjes së këshillit bëhet nga kryetari. Pika 6. Njoftimi për mbledhjen e këshillit bëhet, si rregull, jo më pak se 10 ditë para datës së zhvillimit të mbledhjes. Njoftimi përmban datën e mbledhjes, orën, vendin dhe rendin e ditës.
Vendi vacant, të cilin z. Ervis Moçka mori në këshillin e Qarkut është krijuar nga largimi i znj. Xhuljeta Naqo nga Keshilli Bashkiak i Vlorës. Të gjitha sa më sipër nuk janë veçse mishërimi i problematikave të rënda të lidershipit të PS, të cilat lëvizja Zgjidhja i ka denoncuar me forcë gjithë këtë kohë.
Dhunimi i socialistëve të thjeshtë sepse ata nuk mendojnë si kryetarët; dhunimi i parimeve kushtetuese të të drejtës për një proces të rregullt; dhunimi i votimeve dhe tjetërsimi i tyre në një klimë terrori, thjesht se ashtu kanë dëshirë kryetarët duhet të marrin fund përpara se Partia Socialiste nga kapitali më i çmuar politik i popullit tonë të kthehet në një ngrehinë të braktisur, të përçmuar e të pamundur për t’u rikuperuar. Ftoj të gjithë socialistët dhe të gjithë shqiptarët të solidarizohen kundër këtij atentati që i bëhet votës së lirë pikërisht në një kohë në të cilën kjo temë dhe episode si ky po rrezikojnë mbajtjen e zgjedhjeve dhe fatin e te gjithë shqiptarëve”.
(XH.A/SHUPLAKA)
Discussion about this post